Geh git wă măi mok sồ, geh uă ngan hìu làng bol lơh broă sa tàm càr Lào Cai neh rơcang yal phan geh lơh tơh bơh tàm suơn hìu nhă tờm. Mìng mờ dùl dơ̆ pờ tơlik tơn (livestream), cau blơi tàm ală tiah gơtùi sền broă lơh, dan blơi phan mờ geh tŭ là dan tus lòt nhơl sền broă lơh sa suơn sre tơn.

Lŏ Lù Minh Tình, cau tờm suơn tam plai kroăc tàm sàh Mường Khương pà git: “Bè bol añ neh dan tàm TikTok den uă cau neh geh tus tơn tàm suơn hìu añ mờ yal wơl là khà priă vé mŭt tàm suơn 30 rơbô đong mờ sa plai kroăc tàm suơn kàr lơi kung di lơm là gơdờp ngan, gam blơi plai kroăc cèng rê den 20 rơbô đong tàm 1 kĭ. Nhai sơnrờp ngan tŭ mŭt tàm kàl tơnhào hìu añ neh tăc geh mờr 3 tấn plai kroăc”.

Bơta do pà gŏ, măi mok gam dong kờl phan geh lơh bơh broă lơh sa suuơn sre tiah kơh bơnơm càr Lào Cai tơrmù uă ngan bơta ngài mờ drà kă bro. Ờ mìng plai kroăc, uă phan geh lơh bơh broă lơh sa suơn sre krơi is bè ce, prìt, sa ñân, phe Séng Cù… kung neh “tơlik tàm internet”, tơrbŏ bal tơn cau tam mờ cau blơi.

Ồng Phạm Đức Trung, Phó Củ tịc Anih duh broă Làng bol sàh Mường Khương pà git: “Bol añ kung neh lơh anih tơrbŏ bal nàng tơrbŏ bal tăc phan mờ mblàng yal nàng làng bol in ngui internet mpồl bơtiàn. Lài ngan ală bơta phan mìng geh tăc mờ cau blơi gùt dar càr Lào Cai mơ, mơya tŭ do neh tăc tus Hà Nội, Hải Phòng… Làng bol ndrờm geh điện thoại ngăc ngar den tàng broă ngui internet mpồl bơtiàn niam ngan”.

Lơh jăt broă lơh jơnau kờñ dà lơgar 1719, càr Lào Cai neh lơh ală broă lơh nàng dong kờl bè bơto, bơsram tàp atbồ Mpồl lơh broă bal, dong kờl priă càn sa priă cồng ờ uă, dan ngui bơta ngăc ngar ai phan geh lơh, yal phan geh lơh bơh broă lơh sa suơn sre ƀòn lơgar dê… Tus tŭ do uă bơta phan geh lơh bơh ƀòn lơgar dê neh hào gan bồ bơnơm, lòt gan ƀòn lơgar, tus tàm drà kă bro dờng ơnàng rơlao.

Ồng Dương Tuấn Nghĩa, Phó Kwang lam bồ Sờh Niam chài, Tàp pràn să jan mờ Lòt nhơl càr Lào Cai đơs: “Làng bol neh tus bal mờ măi mok pa mhar ngan, uă ngan pang internet, TikTok, facebook neh geh ngui geh cồng nha ngan. Bơta do geh broă dong kờl bơh ală sờh, gah lơh broă, bè Sờh Bơta chài mờ Măi mok, Sờh Niam chài, lòt nhơl. Bol añ kung neh ngui uă măi mok pa, tàm hơ̆ uă ngan là ai broă tam gơl sồ tus tàm mpồl bơtiàn, tàm hơ̆ uă ngan là tàm mpồl cau kơnòm să”.

Bơh suơn mìr tus mờ bơta chài măi mok sồ là broă tam gơl pràn kơl dang tàm bồ tơngoh lơh sa, kă bro phan bơh làng bol kis tàm tiah kơh bơnơm càr Lào Cai dê. Tŭ geh dong kờl di mờ gùng dà broă lơh, làng bol gơtùi git mờ lơh tờm măi mok, lòt tus tàm drà kă bro dờng ơnàng rơlao. Tam gơl sồ-gam gơs bơta tờm lơh geh broă bơtàu tơnguh kơl jăp ai broă lơh sa suơn sre ƀòn lơgar in.