Ală ngai do, lòt jat ală gơl gùng tàm An Nhơn Bắc, ƀuơn ngan sền gŏ rùp hin làng bol sơngka sền gàr, ntrờn tơmut tàm khàp mờ pik nha mai. Do là bơnah broă kuơmàng ngan, lơh nền tus tŭ tơngai lì bơkàu mờ bơta kuơ bơh tờm mai dê tàm dơ̆ sa tềp. Bi Ngô Văn Hào ơm tàm tổ zân phố Trung Lý, sơnah ƀòn An Nhơn Bắc – cau neh geh 15 nam đềt mềr mờ broă tam mai pà git, hìu bơnhă bi tŭ do geh rlau 3 rbô tờm mai ală bơta, uă ngan là mai giáng long, mai bơkiar mờ mai bonsai: “Tơngai do, ală cau tam mai rơndap tap sèng wơl tờm chi, rơ wah ală tờm mai niam nàng rơndap wơl, tờm lơi ờ niam den lời nam tơnơ̆ tac, tŭ do làng bol neh jun pơndiang tờm mai tus ală drà tơrgùm bal tàm tiah gùt dar Anih duh broă Làng bol sơnah ƀòn neh rơndap lài ù tiah nàng tac ală cau blơi nàng rê wơl tac wơl in. Tŭ do, ală cau tam mai kung gam gơ jă gơ jal tơmut tàm khàp ală tờm mai mờ pik nha tờm mai in, broă do den tŭ do làng bol kung gam lơh jal mhar ngan”.

Gơ rờm bal mờ nùs nhơm lơh broă jal mhar, bi Ngô Minh Trí ơm tàm Tổ zân phố Trung Lý, sơnah ƀòn An Nhơn Bắc geh mờr 200 tờm mai dờng dềt ală bơta, kờp dŭ rơp tac mờr 600 tờm tàm dơ̆ sa tềp do. Bi pà git, tơnơ̆ dà tih dà lìu, broă sơngka sền gàr tờm mai sồr pal roh uă tŭ tơngai rlau, mơya kơnờm trồ tiah ƀuơn ƀuài, tờm mai kis wơl niam ngan. Kung jat bi Trí yal, ală nam rềp do, jơnau kờñ ròng tờm mai bonsai ngai sơlơ geh uă cau kờñ tài gơ dềt, ƀuơn bơka, ràng tơlik tai: “Tŭ do gam sơngka sền gàr wơl tờm chi mờ pik nha, priă tac gơ tam gơl bơh 500 rbô tus 1 tơlak đong dùl tờm. Mai bonsai yờ nggờc rlau den tàng ơn tềng kơƀàng lơh broă là uă, mai den li la ngan bơta, mơya tŭ do bonsai là bơta mai geh uă cau kờñ ngan rlau jơh. Nàng lơh gơlik bơta mai do den sùm bơh tờm mai giáng long halà mai lơyah nsrum hơ̆ sồng koh, ngui bơta chài nàng mòn wơl, den roh pơgap 2, 3 nam hơ̆ sồng geh tờm mai bonsai”.

Tàm tŭ hơ̆, gơ wèt mờ ală cau tam mai jŏ nam, bơta tam gơl jơnau kờñ blơi mai kung lơh gơlik uă bơta kơlôi rơcang sơl. Ồng Lê Văn Tuấn ơm tàm sơnah ƀòn An Nhơn Bắc, cau geh rlau 40 nam tam mai tŭ do geh mờr 500 tờm mai giáng long, tàm hơ̆ geh uă tờm mai neh git nđờ jơt nam pà git: “Mai tac tàm drà kă bro tŭ do li la rlau mờ lài uă ngan, rài yau den mai dêt rlau, lài do uă ngan là tam giáng long. Lài do ờ geh tờm mai nàng tac, ai tŭ do cau tam ur ar den tàng khà tac lơyài rlau. Mai añ tam den 20 nam kung geh, 30 nam kung geh sơl, dềt ngan rlau jơh tàm suơn kung neh 6 nam, tŭ do tam gơl ờ gơtùi, añ neh kra, ờ di kờñ mòn dùl tờm bonsai là gơtùi lơh mơ tơn”.

Sơnah ƀòn An Nhơn Bắc, càr Gia Lai geh tơng gơs bơh bơta tơmut bal ală sơnah ƀòn, sàh bơh ƀòn drà dờng An Nhơn, càr Bình Định yau dê, tŭ do gơ wèt càr Gia Lai. Do geh sền là tiah tam mai uă ngan mờ tiơng pơn rơ ngan bơh tiah tàm gùl lơgar dê, mờ rlau 450 hìu bơnhă làng bol, bă ù tam rlau 145 lồ, cèng wơl priă jền lơh geh rlau 100 tơmàn đong pah nam.

Càl rbut dờng sồ 3 tàm nhai 11 nam lài geh bal mờ mìu dà tih dà lìu dờng ngan neh lơh gơbàn hoàc huơr kơn jơ̆ ngan tus uă tiah tam uă mai bơh càr Gia Lai dê, tàm hơ̆ geh sơnah ƀòn An Nhơn Bắc. Dà tih dà lìu neh bam jơh dồ ròt ală suơn tam mai, lời wơl ală nggu bam tàm bŏ, rơyas gơtìp aniai, ntê, nha gơ jrùh jơh. Mơya tơnơ̆ tŭ dà gơ hoài soat, cau tam mai tàm do neh sơrbac mhar sơn đờm lơh wơl broă lơh sa. Tơl suơn mai geh lơh niam wơl ù, koh sang ntê ờ diơng, ròng wơl rơyas. Ală tờm mai tồn lah ờ kis wơl den tŭ do neh rơhời gơs niam wơl, mum bơkàu neh dờng, rơcang wă rò nam pa mờ cèng bal uă bơta kơp kơnờm bè dùl sa tềp wil tơl, hờm ram.

Ồng Đinh Thanh Trình, Phó Củ tịc Anih duh broă Làng bol sơnah ƀòn An Nhơn Bắc pà git, trồ tiah lơh aniai tàm nam lài neh lơh mờr 120 rbô tờm mai gơtìp hoàc huơr, kờp dŭ hoàc huơr rlau 80 tơmàn đong. Tềng đap bơta geh ngan hơ̆, gơnoar atbồ sơnah ƀòn neh lam lơh uă broă lơh dong làng bol lơh wơl broă lơh sa: “Nàng lơh gơlik bơta ƀuơn ai làng bol in lơh sa mờ tac tờm mai tàm dơ̆ să tềp den anih duh broă làng bol sơnah ƀòn neh lam lơh uă gùng dà broă lơh, tàm hơ̆ geh ờ sa, tơrmù priă ơpah ƀlàng tac, lơh gơlik bơta ƀuơn tam pà gùng rơndeh lòt bơh ală càr tiah đah jum – tiah đah tô dà lơgar lòt blơi mai, lơh gơlik bơta ƀuơn ai cau lòt blơi mai bơh sơnah ƀòn dê in. Mờ kung geh ală gùng dà broă lơh dong kờl, tă pơgồp jơnau đơs ai kâp hơđang, anih priă jền lời ing ờ hềt lùp dồs halà ai càn dong kờl priă cồng ờ uă nàng làng bol in ƀuơn ƀuài mờ geh priă tă lơh broă wơl”.

Tàm nggùl ală suơn mai gam mut tàm kàl tac bro, sap ntas jơr trơi koh ntê, sap ntas ƀồm dà gơ bơrlŭ bal mờ àng mat tơngai sòl lồi ngai lơh gơlik pang rùp lơh broă hô hơng, bềng lìu bơta kơp kơnờm. Gơ wèt mờ cau tam mai An Nhơn Bắc, kàl mai sa tềp nam ơseh 2026 do ờ mìng là kàl tac bro, mờ gam là cơng tàng ai bơta kơ̆ dơn sơrlèt gan trồ tiah lơh aniai, nàng tơl kàl mai lì di tŭ tơngai hơ pơrgon gơ cèng bal dùl nam pa mờ git nđờ bơta kơp kơnờm.