Tàm tiah gơlik geh rềs àr is ồn kơn jơ̆ ngan lơh 3 nă cau lơh phan chơ̆t mờ 2 nă cau lơh phan gam roh thĭt, broă lòt jòi kung gam geh pơn jat tai lơh. Tam mho mang ngai 31/12 Mpồl lơh broă dong kờl mờ cau ñơ̆p dà ờs mờng bơh Kwang àng càr Kon Tum dê pa jòi gŏ bàr pe bơnah ƀồc bơh 2 nă cau lơh phan dê tềng hơđơm tơnau dà jrô kềng gah jơng bơtơ̆t Hìu măi đèng dà dê. Bulah gơ jal ngan mơya broă jòi dong kờl rềs àr kung neh pal ơm ing tàm trồ mang tài bơh trồ mang jơngo mờ trồ tiah mrềt ngan.

Ồng Lê Như Nhất, Kwang lam bồ Sở Lơh sa mờ măi mok mờ Kă bro phan càr Kon Tum pà gĭt, bal mờ broă lơh lòt jòi 2 nă cau lơh phan gam roh thĭt, Anih duh broă Làng bol càr neh sồr ală mpồl lơh broă geh gơrềng bơsong jơnau gơ lời wơl mờ sền gĭt jơnau tờm gơ lam tus broă rềs àr lơh broă do. Huyện ủy kơnhoàl Đăk Glei, pà gĭt, bal mờ lơh ngan lơh mhar tŭ tơngai jòi 2 nă cau lơh phan gam roh thĭt, gàr niam lơngăp lơngai, rơndăp tăp sèng tàm tiah lơh broă, gơnoar atbồ tiah do mờ cau tờm bơcri priă lơh Hìu măi đèng dà Đăk Mi 1 là Kông ty pơgồp bal Quang Đức Kon Tum kung gam pơn jat tai lùp còp, pơndờm pơnđiang hìu bơnhă ală cau lơh phan gơtìp rềs àr.