Tàm 5 nam do, Broă lơh neh geh lam lơh ndrờm bal tàm jơh ală càr, ƀòn dờng; neh pờ rlau 300 rbô ơdŭ bơto pơlam, mblàng yal bè kloh niam phan sa, hòi jà rlau 8 tơlak 500 rbô hìu bơnhă mờ anih dềt, rah rài kĭ jơnau hơ pơrgon lơh gơlik, kă bro phan lơh gơs bơh suơn sre, brê bơnơm, phan tàm dà kloh niam ờdo ờdă. Broă lơh kung neh dong kờl bơt bơtàu git nđờ jơt rbô broă lơh lơh sa suơn sre jat jơnau sồr VietGAP, hữu kơ, lơh sa suơn sre tơlir, tàm pơdar; mờr 9 rbô phan OCOP, git nđờ rbô mpồl lơh broă bal, mpồl lơh bal geh pơlam, crơng gơs pa halà lơh kơ̆ wơl, pơgồp bơnah tơnguh priă jền lơh geh mờ tơnguh bơta pràn tàm pơrlòng bơh phan lơh gơs bơh suơn sre dê tàm drà kă bro tàm lơgar mờ tac hờ lơgar ndai.

Đơs pơn dut pơrjum, Phó Thủ tướng ồng Lê Thành Long đơs sùm, tơngai tus kờñ pal tam gơl pràn bơh mblàng yal gơ gơs pơlam lơh ngan ngồn; tam gơl broă lơh bơh cau lơh gơlik phan dê, ngan là tiah dềt, rah rài; lơh pràn bơt bơtàu ală mpồl lơh gơlik phan tơlir, đềt mềr mờ tiah ơm kis, tàm pơdar, pơgồp bal mờ tam gơl sồ mờ tam gơl pa bơceh lơh. Ală kâp, ală gah broă lơh gàr tơl priă jền, bal mờ làng bol wèt tus jơnau kờñ tơn jơh bơta lơh gơlik, kă bro phan sa ờ niam, sền gàr pràn kơldang să jan mpồl bơtiàn mờ bơtàu tơnguh broă lơh sa suơn sre kơnhăp kơ̆.