Tàm càr Dăk Lăk, do là dùl tàm ală càr geh broă bơto bơtê dờng ngan tàm tiah Tây Nguyên dê, broă lơh niam wơl mpồl hìu bơsram gam geh lơh mờ khà broă dờng ngan. Gùt càr tŭ do geh 1 rơbô 267 hìu bơsram, hìu bơto broă lơh dà lơgar lơh mờ rơlao 40 rơbô 400 nă kwang bàng, cau pơgru, cau lơh broă. Jăt gùng dà broă rơndăp tăp sèng dê, khà hìu bơsram kờp dŭ gơmù gam 655 hìu. Broă rơndăp tăp sèng ờ mìng nàng tơrmù broă atbồ mờ gam wèt tus jơnau kờñ ngui geh cồng nha rơlao bơta pràn, tơnguh uă bơta niam broă bơto. Mơya, bal mờ hơ̆ là jơnau geh ai tàm broă kwang bàng, tàm hơ̆ uă ngan là broă rơwah mpồl cau lam bồ hìu bơsram, phó lam bồ hìu bơsram tàm ală hìu bơsram tơnơ̆ mờ tŭ rơndăp tăp sèng. Anih duh broă Làng bol càr Dăk Lăk sồr broă rơwah kwang bàng atbồ hìu bơsram pal ai bơh tàm ală khà broă mùl màl, loh làng, ndrờm bal mờ gơtùi kờp sền. Ală bơta geh sền sơwì geh sơnam, broă lơh mờng chài, bơta pràn atbồ, bơta ngăc ngar lơh broă.

Ồng Đỗ Hữu Huy, Chủ tịch Anih duh broă Làng bol càr Dăk Lăk sồr: “Sờh Bơto bơtê mờ Bơsram gờñ pơgồp bal mờ Sờh Broă dơlam is gờñ yal khà broă rơwah cau lam bồ hìu bơsram loh làng, sơlơ loh làng gờñ sơlơ niam, geh rơndăp tăp sèng, sơlơ loh làng kàr lơi sơlơ niam. Geh bal mờ hơ̆ Sờh Broă dơlam is kung pal ai ngui khà geh ai lơh cau lam bồ, phó lam bồ mờ sền sơwì nền nòn ngan cồng nha bơta pràn tàm tơngai tus nàng pleh mờ bơta gơlik geh ală bơta gơkòl”.

Ờ mìng càr Dăk Lăk, ală càr ndai tàm tiah Tây Nguyên kung gam lơh ală broă lơh pràn kơl dang ngan nàng tam gơl pa mpồl bơto bơtê. Tàm càr Lâm Đồng, gùt càr do tŭ do geh 1 rơbô 453 hìu bơsram dà lơgar lơh, kờp dŭ tơnơ̆ mờ rơndăp tăp sèng gam 977 hìu bơsram, gơmù 476 hìu bơsram; mờ tơrmù rơlao 1 rơbô 810 nă kwang bàng atbồ mờ cau lơh broă. Broă lơh do geh sồr lơh di pal mờ bơta geh bơh tơl tiah dê; tàm hơ̆ uă ngan là gàr niam bơta ngài lòt rê bơh kơnòm bơsram dê, bơta geh phan bơna mờ jơnau kờñ geh sùm niam lơh broă bơto mờ bơsram tàm tiah kơh bơnơm, tiah ngài.

Tàm càr Gia Lai, Anih duh broă Làng bol càr do neh ai ngui gùng dà rơndăp tăp sèng, bơyai lơh wơl mpồl hìu bơsram mầm non mờ ală kấp dà lơgar lơh nàng tơnguh uă cồng nha atbồ, ngui mpồl cau pơgru, phan bơna. Jăt gùng dà broă lơh, khà hìu bơsram mầm non mờ ală kấp dà lơgar lơh càr dê rơ̆p gơmù bơh 1 rơbô 267 hìu gam 699 hìu bơsram, gơmù 568 hìu bơsram. Broă rơndăp tăp sèng geh lơh jăt tŭ, gơdờp bal mờ bơta geh bơh tơl tiah dê; tàm hơ̆ tàm 61 sàh, sơnah ƀòn tiah ƀuơn, khà gơmù hìu bơsam geh rơlao 51%, gam 74 sàh, sơnah ƀòn gam tai geh rơlao 37%. Gah bơto bơtê mờ bơsram càr Gia Lai đơs nền broă rơndăp tăp sèng rơ̆p pơgồp bal mờ gơnoar bơsram sră bơh kơnòm bơsram dê, tàm hơ̆ uă ngan là kơnòm bơsram tàm tiah kal ke, tiah làng bol jơi bơtiàn ờ gal cau.

Bal mờ broă cau lơh broă bơh gah bơto dê, broă mblàng yal, ai geh bơta ring bal tàm mpồl bơtiàn kung geh ală càr tàm Tây Nguyên sền kwơ sơl. Tềng đăp mờ ală jơnau ờ suk ơm bơh ờ uă cau mè bèp dê bè broă di gơlan tàm bơrlŭ broă bơsram sră oh kòn dê, gah bơto bơtê tàm ală càr đơs nền broă rơndăp tăp sèng mìng là bơyai lơh wơl broă cau atbồ jăt gùng dà broă lơh hìu bơsram tờm mờ ală hìu bơsram gơwèt bal; kơnòm bơsram kung gam bơsram tàm hìu bơsram, ơdŭ bơsram bal mờ anih tŭ do dê, ờ lơh gơkòl tàm broă bơsram sră.