Ngai òr (04/08), tàm tơngume Dơ̆ pơrjum ờ ờs mờng dơ̆ Dùl, Quốc hội khoă XVI, tŭ cribơyai tàm jơnum bè rơndap lơh Adat mblàng yal, bơto bơtê adat boh lam (tam gơl), ồng Trần Thanh Mẫn, Chủ tịch Quốc hội đơs sùm, broă tam gơl adat boh lam ờ mìng ơm wơl tàm broă tam gơl jơnau cih halà bơ tơl kơnòl broă ai ală anih lơh broă in, mờ pal lơh gơlik bơta tam gơl ngan ngồn, bơt bơtàu niam chài duh rơngòt adat boh lam tàm jơh gùt mpồl bơtiàn. 

Ồng đơs là, broă lơh mblàng yal, bơto bơtê adat boh lam tàm tơngai lài gam geh tềl tơnggŏ mìng đơs gời, ờ hềt lơh jat jơnau sồr mùl màl. Chủ tịch Quốc hội sồr kờñ pal tam gơl bơh bồ tơngoh kơlôi sơnơng “ai pà” jơnau yal tơnggit gơ gơs bồ tơngoh kơlôi sơnơng drơng broă, dong làng bol tơnguh pràn jak sền gàr is gơnoar, bơta kuơ dipal he dê mờ adat boh lam. Chủ tịch Quốc hội sồr cih mùl màl broă jàu jơ kơnòl dong kờl adat boh lam mờ mblàng yal, bơto bơtê adat boh lam pal geh pah nam gơ wèt mờ mpồl cau chài cah rơña, cau geh jơnau git wă jrô bè adat boh lam. Mờ kung kơlôi sơnơng bơt bơtàu ală mpồl lơh broă sồ dà lơgar bè mblàng yal, bơto bơtê adat boh lam, đo was bơta git, wă wờng mờ lơh jat adat boh lam làng bol dê tàm măi mok sồ, pơgồp bơnah ai adat boh lam ngan ngồn gơ mut tàm rài kis.