Lòt mờ plung wàs tê tềng hơđăng măt dà Bàu Đá, gơtùi sền gŏ jơh ñhơ̆t chi che kis tàm dà bơh măt dà rơngơm mrềt. Ală bồt ñhơ̆t, grồi chi, pơnai lŭ mpờl hơđăng măt dà, mờ ală tơnau sen ƀô thồm ngan jơh gùt ngai nhai duh, sơlơ lơh ù tiah Bàu Đá sơlơ niam bơnĕ ngan. Neh rlau 70 sơnam, ồng Đào Kim Thông ơm tàm thôn Mỹ Điền, sàh Hoà Thịnh neh ơm rềp mờ bă brê gơbam dà do bơh dềt mơkung sơrlèt gan ală nam nhai tam lơh cui rơcai ngan. Ngan bă brê gơbam dà Bàu Đá do neh jơm glòm ai làng bol in mờ ròng kis Kăc màng nàng lơh geh dơ̆ ñă ntàu tam lơh bal Hoà Thịnh nam 1960.

"Kăc màng mờ làng bol tàm do là tàm rài ntoăt cau sò tơm…đìh plung mŭt tàm do lơh hìu kù tềng hơđơm mƀur chi dờng hơ̆, mŭt ndo pồn. Gŏ rơndeh par là mŭt pồn tàm mpung chi. Ñă ntàu tam lơh bal hơ̆ sồng tus nam 1963, 1964 pơn jăt tai tam lơh mờ cau sò tơm, he ntoăt mŭt tàm ù gơbam dà do, mŭt tàm bơnơm pồn tềng trồm rơgồng hơ".

Nhai 7 mờ Nhai 8, bơkàu sen, bơkàu súng tàm Bàu Đá Hoà Thịnh kung gam tơlir niam ngan. Dà dum bò, dà bò, dà dum loañ bơh ală bă bơkàu măt dà tơnggŏ bal bơta niam bơnĕ bal mờ bơkàu lộc vừng, bơkàu bằng lăng bơh hơđăng jơnhoa…sơlơ lơh niam rlau tai pang rùp brê gơbam dà Bàu Đá sơlơ gơklŏ gơcrà, gơhòi gơ jà ngan. Gơ wèt mờ làng bol ƀòn lơgar, Bàu Đá là ù tiah niam bơnĕ is ngan, mờ là bă ù kah yau, kung là tiah geh uă phan bơkah:

"Añ gŏ bơta niam tàm tiah gơbam dà Bàu Đá do là geh dồ do, hơ̆ sồng ka, sềm, chi bần, sen, súng...Tơl bơta chi. Tàm do lòt nhơl là niam ngan. Bơh nhai 12 tus dì nhai 9, nhai 10 nam tây là niam ngan".

Sùm tàm uă nam do, làng bol thôn Mỹ Điền đơs is mờ ală thôn, ala sàh ơm rềp bal kis kơnờm mờ phan tàm dà bơh bă brê gơbam dà do dê. Ờ mìng bè hơ̆ lơm, mờ ù tiah brê bơnơm niam bơnĕ ngan, bal mờ ală chi che phan kis rơ̆ ru, li la, bă brê gơbam dà Bàu Đá Hoà Thịnh gam ơm tềng đăp tŭ niam bơtàu tơngguh lòt nhơl ƀòn brê bơnơm. Ồng Phương Văn Lành, Bí thư Đảng ủy sàh Hoà Thịnh pà gĭt, ƀòn lơgar pơlam gùng bơtàu tơngguh brê gơbam dà Bàu Đá gơgơs anih lòt nhơl mpồl bơtiàn gơ jăt bal mờ prăp gàr brê bơnơm geh is:

"Ƀòn lơgar neh bơyai lơh tơrlòng dơ̆ lòt sền lòt nhơl Bàu Đá. Mờr tus, den rơ̆p geh ală jơnau neh lơh nền bơtàu tơngguh lòt nhơl mpồl bơtiàn jăt gùng tơnggơs mpồl lơh broă bal lòt nhơl mpồl bơtiàn mờ ală làng bol tàm ƀòn Mỹ Điền do rơ̆p là ală cau să tờm tơn tus bal lơh lòt nhơl. Khi rơ̆p wàs plung lam năc lòt nhơl lòt còp brê gơbam dà Bàu Đá, mờ rơ̆p là ală cau pơlam yal tơnggĭt ù tiah ƀòn lơgar, jơnau tơl pràn bal mờ ù tiah bơh bă ù gơbam dà Bàu Đá do dê".

Hoà Thịnh- tiah neh geh tŭ là tiah “sùm gơtìp dà lìu” bòl glar kal ke do gam ơm tềng đăp tŭ tơngai tam gơl să bềng hơ pơrgon. Broă hòi guh jơnau tơl pràn lòt nhơl tàm tiah ngơr bam dà Bàu Đá ờ mìng pờ gơlik broă lơh broă sa, tơngguh uă rài kis làng bol in mờ gam là cê khoă kwơmàng prăp gàr wil tơl bơta niam gam bè ờs bơh brê bơnơm geh is dê.