Tàm bơta duh rơ ồl trồ klo ngai dê, ồng Y Ung Byă, ơm tàm ƀòn Cuôr, sàh Ea M’Droh, càr Dăk Lăk kung gam lơh hìu. Bàr nă cau dong lơh hìu ndang ngan bơrlŭ sơmang, koh lòs, ai pơ ùr ồng dê den sùm jun ală xô sơmang neh bơrlŭ guh hờ đang dra lơh hìu. Hìu ơnàng 72 thơk vuông gam mờr lơh gơs. Ồng Y Ung pà git, hìu rƀah, geh 6 nă cau, bơh lài sùm kơp kờñ geh dùl nơm hìu kơnhăp kơ̆. Tŭ do, Chi ƀộ Kwang àng sàh Ea M’Droh dong kờl priă blơi phan lơh hìu, ồng Y Ung ơpah tai cau lơh mờ să tờm ồng lơh is hìu mờ ồng kơp kờñ: “Geh hìu den chờ hờp ngan, tơnơ̆ do rơp lơh ngan lơh sa, leng càn tai bơh oh mi jơi nòi nàng lơh gơs hìu. Hìu ơm là bơta gơn kơnờm nàng pơn jat tai pơn đơl lơh sa, kơlôi rơcang oh kòn lòt bơsram tus gùng tus dà, pơn jat tai brồ guh lik klàs rƀah”.

Kung ơm tàm ƀòn Cuôr sơl, hìu bơnhă ồng Y Đek Ênuôl pa mut tàm hìu pa dờng niam, kơnhăp kơ̆. Ồng Y Đek ờ gơtùi pồn bơta chờ hờp mờ ngoh rơngac, tài mờr 30 nam do, jơh hìu bơnhă ồng dê kis tàm hìu ndàp neh yau, rơkàng sơlo neh bluh jơh. Bơh nhai 8 nam lài, hìu bơnhă ồng geh Chi ƀộ Ală anih lơh broă Đảng sàh Ea M’Droh lòt bal, sùm lùp còp, pơn jờng. Ờ mìng dong kờl dùl yô kơnrồ sơntìl, Chi ƀộ Ală anih lơh broă Đảng sàh gam dong kờl rlau 95 tơlak đong lơh hìu Tam klac dờng. Geh hìu, geh gùng dà bơtàu tơnguh lơh sa, ồng Y Đek iang nùs lơh sa mờ rơcang broă rơndap lơh ai tơnơ̆ do in: “Añ geh càn tai bơh oh mi jơi nòi geh 40 tơlak đong mờ rơcang lài lơh bal, lơh geh hìu bè tŭ do. Tŭ do, geh hìu ơm den iang nùs pơn đơl lơh sa, tơm rơhời ală bơnah priă dồs, hơ̆ sồng pơn jat tai tềm pềr nàng lơh tai hìu ƀềp mờ ală broă lơh ndai, hơ̆ sồng geh priă jền rlau den rơp rề ơnàng tai hìu, lơh tai cơldŭ ơm nàng hìu đam gơ in dờng niam rlau”.

Jat ồng Y Sắk Kbuôr, Lam bồ ƀòn Cuôr, ờ mìng tus jàu dong kờl dùl dơ̆ hơ̆ sồng lik lòt, ală chi ƀộ gam geh bơta đềt mềr, sùm lùp còp, jat sền, pơlam, tàm tơrbŏ bal priă jền mờ pơn jờng ală hìu bơnhă rơhời gàr kơ̆ rài kis. Broă lơh do pa ngan, mơya neh cèng wơl cồng nha loh làng, ngan ngồn dong ală hìu bơnhă rƀah geh anih ơm kơ̆ kơljap, rơhời brồ guh. Ƀòn Cuôr tŭ do geh rlau 370 hìu bơnhă mơya geh mờr 100 hìu bơnhă gơ wèt hìu bơnhă rƀah mờ ndrờm bè cau rƀah, ồng Y Sắk kơp kờñ: “Bơh broă lơh tơrlòng lài den geh uă bơta lòt bal, dong kờl, làng bol geh gùng dà bơtàu tơnguh rlau, neh dong kờl kơnrồ, lơh hìu, lơh gơlik bơta pin dờn, gơn kơnờm nàng làng bol in pơn đơl lơh sa, jơh nùs brồ guh. Kơp kờñ là mờr tus rơp geh tai uă bơta dong kờl, lòt bal bè do nàng ală cau geh rài kis kal ke rơp geh tai bơta niam nàng sơrlèt gan kal ke, bơtàu tơnguh lơh sa”.

Mờ rlau 7 rbô hìu bơnhă làng bol, tàm hơ̆ mờr 900 hìu bơnhă rƀah mờ ndrờm bè cau rƀah, nàng lơh geh jơnau kờñ ờ gam hìu bơnhă rƀah tàm nam 2030 jat Jơnau lơh nền tàm pơrjum Đảng ƀộ càr Dăk Lăk, sàh Ea M’Droh ờ gơtùi mìng kơp gơn tàm ală gùng dà broă lơh dong kờl lơm gời. Tơnơ̆ tŭ tơmut bal mờ lơh broă gơnoar atbồ 2 kâp, Đảng ủy sàh neh kơlôi sơnơng lam lơh broă lơh tơrlòng lài “Tơl mpồl đảng lòt bal mờ hìu bơnhă làng bol lik klàs rƀah”, hòi jà ală chi ƀộ pơgồp bal tơn mờ tơl hìu bơnhă làng bol, bal mờ gơp tă bơsong kal ke, pơlam bơtàu tơnguh broă lơh sa mờ tàm tơrbŏ bal ală priă jền dong kờl.

Tơnơ̆ dùl nam, broă lơh tơrlòng lài neh geh lam lơh tàm 4 chi ƀộ, pơgồp bơnah tơn jơh 2 nơm hìu ing, dong kờl 4 broă lơh tơrlòng lài lơh sa ai ală hìu bơnhă rƀah in. Ồng Nguyễn Văn Bông, Phó Ƀí thư Duh broă sùm Đảng ủy sàh Ea M’Droh pà git, ƀòn lơgar gam wèt tus bơt bơtàu broă lơh nàng tơl chi ƀộ ngan ngồn gơ gơs là anih kơldìng làng bol dê: “Bơta kơp kơnờm dờng ngan rlau jơh ờ di là bol hi dong kờl geh priă jền kàr lơi, nđờ nơm hìu, nđờ nơm kơnrồ mờ là lơh gơlik bơta pin dờn ai làng bol jơi bơtiàn dùl êt nă cau in git là, ờ cau lơi gơtìp lời wơl hờ ngkời mờ sùm geh kwang bàng gơnoar atbồ ƀòn lơgar lòt bal. Mờ kung dong kwang bàng, đảng viên tŭ lòt ngan ngồn kâp hơ đơn rơp ngan ngồn rềp làng bol, wă làng bol rlau tai”.

Tơnơ̆ ală cồnbg nha bơh chờm, Đảng ủy sàh Ea M’Droh gam rơcang tơn jơh broă lơh tơrlòng lài nàng pơn jat tai lơh sir mờ rề ơnàng lam lơh tàm ală chi ƀộ hìu bơsram mờ bơta kơp kơnờm lơh gơ rề nùs nhơm lòt bal tus uă gah rài kis ƀòn lơgar dê.