Bơta pa pơnrơ ngan bơh Jơnau lơh nền tàm pơrjum do dê là tam gơl pràn ngan bơh kơrnoăt sền lài tus mờ sền tơnơ̆, mờ tam pà kấp gơnăp gơnoar ai, ai wơl màh sồ tiah tam, màh sồ hìu dăp in ai Chủ tịch Anih duh broă Làng bol kấp sàh in. Jăt mờ hơ̆, mpồl lơh broă, cau dùl nă să lơh jăt broă kờp yal mờ dờp kơnòl bè broă lơh di pal bơh jơnau tơngit dê; gơnoar atbồ ƀòn lơgar lơh jăt broă atbồ, jăt sền, toh wơl, ơm ing ha là lơh wơl màh sồ di jăt mờ jơnau geh ai.

Gơwèt mờ ală tiah mìng geh tam tờm sầu riêng tàm Tây Nguyên dê, broă lơh pa geh kơ̆p gơn bơsong uă kal ke tàm broă dan cih măt nàng geh màh sồ drơng tàm broă tăc mờ lơgar bơdìh in. Tơngai bơsong sră nggal geh tơrmù uă ngan. Gơwèt mờ ală mpồl lơh broă, cau dùl nă să is ờ dan tăc mờ lơgar bơdìh, tơngai bơsong gơmù bơh 14 ngai lơh broă gam 3 ngai; di lah broă tăc mờ lơgar bơdìh di tàm ală drà kă bro jăt jơnau kờñ màh sồ dê, tơngai bơsong gơmù gam 10 ngai.

Ồng Vũ Đình Cường, Phó Kwang Lam bồ Sờh broă lơh sa suơn sre mờ Tiah ơm kis càr Lâm Đồng đơs là, Jơnau lơh nền tàm pơrjum sồ 36 bơh Chính phủ dê di pal mờ jơnau kờñ tàm mùl màl, tàm hơ̆ uă ngan là tŭ geh ai ờ kơrian bă ù tiah tam, ai geh bơta niam nàng ală bă ù tam bơrlŭ bal in, tàm hơ̆ geh phan tam tờm drơng tàm broă tăc mờ lơgar bơdìh in. “Tơnơ̆ mờ tŭ Jơnau lơh nền tàm pơrjum sồ 36 bơh Chính Phủ geh ai ngui, càr Lâm Đồng neh sồr ală sàh, sơnah ƀòn, anih lơh broă, mpồl lơh broă gơrềng bal tơrgùm kơlôi sơnơng ală jơnau geh ai pa nàng lơh jăt. Jơnau lơh nền tàm pơrjum geh ai ngui gơdờp ngan, bơsong geh ală gơkòl tàm tơngai do, tàm hơ̆ uă ngan gơwèt mờ tiah tam ờ gơtìp kơrian bè bă ù mờ ală bă ù tam bơrlŭ bal ală phan tam drơng tàm broă tăc phan mờ lơgar bơdìh in”.

Ồng Nguyễn Hoàng Hiệp, Thứ trưởng Bộ Broă lơh sa suơn sre mờ Tiah ơm kis đơs nền, nàng lơh jăt Jơnau lơh nền tàm pơrjum sồ 36 bơh Chính phủ dê gờñ mŭt tàm rài kis, ală càr, ƀòn dờng pal mhar lơh broă rơndăp lơh, dong kờl kấp sàh in pơlam, lơh di jơnau tơngit tiah tam, hìu dăp, tơnguh broă sền gròi, jăt sền mờ mblàng yal. Broă lơh jăt măi mok ală broă lơh màh sồ ờ mìng dong kờl tơrmù priă tă, tơngai lơh ai cau lơh broă in, mờ gam tơngu uă bơta loh làng, geh kơnòl tàm mpồl ai phan geh lơh bơh broă lơh sa suơn sre dê in. “Sồr ală càr, ƀòn dờng tơrgùm mblàng yal nàng ring bal lơh broă. Tơngu me pa dơ̆ do là kơnòl broă bơh tơl anih lơh broă, mpồl lơh broă; kơnòl bơh ală cau, làng bol tus bal dan cih măt nàng geh màh sồ tiah tam kung loh làng ngan. Ai màh sồ tiah tam dơ̆ do là lơh jăt jơh broă kờp yal mờ dờp kơnòl tềng đăp mờ adăt boh lam bơh tơl hìu lơh sa dê”.

Gơwèt mờ Tây Nguyên, do là tiah tam tờm sầu riêng uă ngan gùt lơgar dê, Jơnau lơh nền tàm pơrjum sồ 36 bơh Chính phủ geh kơ̆p gơn ai geh bơta pràn pa nàng rề ơnàng tiah tam geh khà niam, tơnguh uă bơta pràn tàm pơrlòng, bơ̆t bơtàu măt kă bro sầu riêng Việt Nam tàm drà kă bro ală lơgar dê, mờ pờ geh dơ̆ niam bơtàu tơnguh kơl jăp rơlao ai làng bol lơh broă sa mờ mpồl lơh sa kă bro in.