Anih duh broă Mặt trận dà lơgar Việt Nam pơgồp bal mờ Tổng Kông ty Bièr- Ơlak – Dà hùc lơh jơh tơ hìr Sài Gòn (SABECO) bơyai lơh broă lơh “Ndrờm bal sa tềp Việt Nam – Tàm tơrbŏ bal làm gùt ală tiah” tàm sàh Kim Bảng, càr Nghệ An.

Mpồl bơyai lơh neh jàu 500 bơnah phan pà sa tềp, tơl bơnah phan kờp priă 900 rbô đông geh phan mờ priă mat, dong kờl ală hìu bơnhă rƀah, ndrờm bè cau rƀah tàm sàh. Broă lơh gam geh lơh uă broă lơh niam chài ờs mờng bè trŭ sa, bơka sơlàu phan sa tềp ƀòn Nghệ, pơrlòng klơm mbar lơm pòng, nhơl ală bơta nhơl ñŏ bơh yau, gơ hòi gơ jà gal ngan làng bol tus bal. Di dơ̆ do, mpồl bơyai lơh kung còp mờ pà 20 tơlak đong ai kwang bàng, cau ling Pôs đồng ling sền gàr tiah nhàr lơgar 561 Mpồng nhàr lơgar Thanh Thuỷ, pơn jờng mpồl lơh kơnòl broă tàm mpồl lam lài. Do là dùl tàm ală broă lơh jàu 6 rbô 500 bơnah phan sa tềp tàm 16 càr, ƀòn dờng tàm gùt lơgar in.