Gơguh GRDP tàm quý I nam 2026 càr Dăk Lăk dê kờp dŭ geh di pơgăp 7,5%, ờ uă rơlao mờ broă rơndăp lơh geh ai, ai geh bơta kal ke uă ngan tus mờ ală quý gam tai tàm nam dê. Tàm dơ̆ pơrjum, geh uă jơnau đơs song dơ pă ngan tus mờ bơta kal ke bè kơrnoăt boh lam, lơh niam wơl sră nggal, broă lơh rơndăp broă bal mờ priă geh, sồr tam gơl đơng lam jăt broă neh geh lài gơguh lơh sa mùl màl, pơgồp bal mờ kơnòl broă tus tơl gah broă, tus tơl tiah dê.

Kwang đơng lam Mpồl duh broă Làng bol càr Dăk Lăk sồr sền gròi nền nòn khà gơguh lơh sa jăt tơl nhai, lơh loh kơnòl broă tus tơl gah broă. Ală jơnau đơs kung đơs nền broă lơh niam wơl sră nggal gam lơyài, ờ hềt di pal mờ jơnau kờñ tàm mùl màl, lơh kal ke tus mờ ƀòn lơgar. Ƀí thư Tỉñ ủy càr Dăk Lăk ồng Lương Nguyễn Minh Triết sồr tơrgùm bơsong ală rơndăp broă lơh phan kwơ geh is, năng lượng, lòt nhơl mờ tơnguh lơh niam sră nggal. Nùs nhơm bơh càr Dăk Lăk dê là: ờ lời “lơngăp lơngai” ai să tờm in mờ lơh kal ke mpồl lơh sa kă bro… càr Dăk Lăk ai gùng dà broă lơh tam gơl bồ tơngoh, tơrmù pràn tơngai mờ priă tă lơh sră nggal nàng ai geh bơta pràn gơguh lơh sa.