Ală nam do, bơta git gơ̆p lơh broă bal đah bàr càr geh lơh sùm niam, mờ 14 mpồl lòt rê bal; ală broă lơh hòi jà kă bro phan, tơrbŏ bal mpồl lơh sa kă bro, tìp bal niam chài, lòt nhơl mờ làng bol geh lơh. Mpồl lơh sa kă bro càr Dăk Lăk pơn jăt tai bơcri priă tam, sơnka sền gàr, mơh mờ lơh gơs phan cao su tàm càr Mondulkiri, mờ rơlao 1 rơbô 623 lồ ù tam cao su ai còr bơsơ̆t.

Bàr gah pơgồp bal atbồ, sền gàr gùng nhàr lơgar jòng mờr 72 kơi sồ mờ jòi rồ, tơrgùm, tơn rê ƀồc ntìng cau ling chơ̆t màng. Tơngai lơh broă bơh nam 2026 tus 2030, bàr càr rơ̆p lơh pràn lơh broă bal lơh sa suơn sre kơl jăp, sền gàr brê, uă bơta sinh học, lơh pràn pờ Mpồmh nhàr lơgar Đăk Ruê – Chi Miết, bơcri priă lơh gùng tơrbŏ bal, rơcang kơrian cau tìs gan nhàr lơgar, bơtàu tơnguh lòt nhơl, bơto bơtê, lơh sơnơm mờ lơh oh mi bal ală tiah nhàr lơgar.