Mpồl duh broă Làng bol càr Dăk Lăk khoă XI, tơngai lơh broă bơh nam 2026 tus 2031pa sơn đờm pơrjum dơ̆ sơnrờp. Pơrjum pờ sơnrờp ngan ai broă lơh bơh Mpồl duh broă Làng bol càr tàm tơngai lơh broă pa. Pơrjum dơ̆ do, ală cau ala măt neh bơyai lơh pồ ală groăt: củ tịc, ală phó củ tịc Mpồl duh broă Làng bol càr, ală Mpồl bal mờ Kwang lam bồ ală mpồl tàm Mpồl duh broă Làng bol càr Dăk Lăk khoă XI, tơngai lơh broă bơh nam 2026 tus 2031.

Mò Cao Thị Hoà An, pơn jăt tai geh pồ at gơnoar broă Củ tịc Mpồl duh broă Làng bol càr Dăk Lăk khoă XI, tơngai lơh broă bơh nam 2026 tus 2031. Ồng Đỗ Thái Phong, ồng Từ Thái Giang mờ mò Phúc Bình Niê Kdăm geh pồ lơh Phó Củ tịc Mpồl duh broă Làng bol càr. Ồng Đỗ Hữu Huy, kwang geh jơng rơcang mŭt mpồl Đảng Dà lơgar, Phó Ƀí thư Tỉñ ủy geh pồ at gơnoar broă Củ tịc Anih duh broă làng bol càr Dăk Lăk, tơngai lơh broă bơh nam 2026 tus 2031; Ală Phó Củ tịc Anih duh broă Làng bol càr geh: Đào Mỹ, ồng Nguyễn Thiên Văn, ồng Trương Công Thái mờ mò Hồ Thị Nguyên Thảo. Ồng Lương Nguyễn Minh Triết, Ƀí thư Tỉñ ủy càr Dăk Lăk sồr Mpồl duh broă Làng bol càr mhar kơl jăp bơyai lơh broă, gàr niam broă lơh geh sùm, pràn, geh cồng nha.