Bàr rơndăp broă lơh do geh Tiah drà Jơnum làng bol tiah drà 8, broă lơh ơnàng rơlao 19 lồ, kờp dŭ priă sơn đờm lơh rơlao 1 rơbô 682 tơmàn đong; mờ Tiah drà niam chài, lòt nhơl jơi bơtiàn càr Dăk Lăk, ơnàng rơlao 44 lồ, kờp dŭ priă sơn đờm rơlao 2 rơbô 321 tơmàn đong.

Jơh bàr tiah do ndrờm geh lơh jăt broă lơh pơrlòng blơi rơndăp broă lơh mờ gam lơh gơs ală sră nggal gơrềng bal. Tàm Tiah drà niam chài, lòt nhơl jơi bơtiàn càr Dăk Lăk, broă tơm ntrờn ù tiah gam tìp uă kal ke tài geh ờ uă cau ờ hềt đal git ù tiah, tàm tŭ priă lơh jăt gam ờ tơl tài sơrlèt mờ kờp jơh khà priă bơcri. Lòt sền tàm mùl màl tiah tơnao dà Ea Nao, tềng gah bă ù đah măt tơngai Lik Tiah drà niam chài, lòt nhơl jơi bơtiàn càr Dăk Lăk, ồng Đỗ Hữu Huy, Chủ tịch Anih duh broă Làng bol càr Dăk Lăk đơs là, broă lơh tŭ do ờ hềt lơh jơh bơta kwơ ù tiah geh bal mờ bă ù geh gùt dar tơnao dà dê. Ồng sồr kơlôi sơnơng lơh wơl rơndăp ù tiah, ai ală tiah broă lơh drơng ala di pal, mờ tơnguh bơta niam ù tiah mờ lơh geh priă nàng bơcri blơi phan bơna mờ lơh niam wơl tiah do.