Tơnơ̆ tơmŭt bal, Mpồl tam klăc ală mpồl lơh bơyô bal càr Dăk Lăk neh pồ tơl mpồl cau, tŭ do geh 9 nă cau tàm mpồl. Bal mờ gàr niam ală bơta gĭt gơ̆p lơh bơyô bal, Mpồl tam klăc sền gĭt tờm ngan kơnòl broă pa dê là pờ ơnàng bơta gĭt gơ̆p ală lơgar, rcang lài tàm tơrbŏ bal mờ cau lơh broă bal, hòi jà priă jền di pal mờ jơnau kờñ bơtàu tơnguh càr mờ tơnguh uă cồng nha lơh broă bơh ală cau tàm mpồl dê.

Tơngai pa do, ală mpồl neh gàr niam bơta gĭt gơ̆p tìp mat lơh kwèng làng bol mờ ală lơgar: Lào, Campuchia, Ñờk (Nhật Bản), Hàn Quốc, Ấn Độ mờ uă lơgar lơh broă bal ndai. Ală broă lơh do pơgồp bơnah sơlơ tơnguh tai gĭt wă bal, lơh bơyô bal đah làng bol Dăk Lăk, Phú Yên mờ ală lơgar; tàm hơ̆, bơta gĭt gơ̆p mờ càr Mondulkiri lơgar Campuchia dê pơgồp bơnah bơt bơtàu tiah nhàr lơgar ring lơngai, lơh bơyô bal. Nam do, mpồl tam klăc neh pơgồp bal lam lơh, lơh sir 8 bơnah dong kờl jal mhar tơnơ̆ mìu càl rơbŭt dờng dà tih dà lìu bơh ală mpồl bơdìh Chính phủ lơgar ndai, mờ kờp jơh khà priă rlau 56 tơmàn đong.