Mò H’Dit Byă ơm tàm ƀòn Dhă Prông, sơnah ƀòn Buôn Ma Thuột, càr Dăk Lăk chờ hờp pà git, mò niam nùs ngan tŭ lòt kham kòp mơya mìng cèng điện thoại geh tơmut VNeID: “Bơh tŭ ngui VNeID den tŭ lòt hìu sơnơm ờ duh pal ngui sră kham sơm kòp ờ sa priă tai mờ ală jơnau tơnggit neh geh tơrgùm jơh tàm điện thoại, ƀuơn ngan”.

Jat tơrgùm kờp, tàm nam do, gùt càr Dăk Lăk geh rlau 6 tơlak 900 rbô dơ̆ cau kham, sơm kòp ngui sră kăn kươk làng bol; rlau 2 tơlak 500 rbô sră kăn kươk geh lơh ndrờm bal mờ sră kham sơm kòp ờ sa priă gam geh tơngai ngui. Do là cồng nha bơh chờm tàm lam lơh Ală jơnau neh lơh nền bơtàu tơnguh ngui yal tơnggit jơnau bè làng bol ơm kis, sơnđăn măt mờ dờp geh ngan tàm điện tử drơng tam gơl sồ dà lơgar (hòi lơyah là ală jơnau neh lơh nền sồ 6) tàm càr.

Thượng tá ồng Võ Hùng Tường, Lam bồ cơldŭ kảñ sát atbồ sră pơ àr gơnoar atbồ bè rơndap tap sèng lơngap lơngai mpồl bơtiàn, kwang àng càr Dăk Lăk pà git, mpồl kwang àng neh tus tơl hìu pơlam làng bol tơmut, pờ mờ ngui mat sơnđăn măt tàm điện tử VNeID, ngan là tàm tiah sar lơgar ngài, tiah jơi bơtiàn dồ êt nă cau. Bơh hơ̆, jơnau git wă mờ bơta ring bal bơh làng bol dê gơ wèt mờ tam gơl wơl sră pơ àr gơnoar atbồ, tam gơl sồ geh tơnguh loh làng ngan: “Git nền tam gơl wơl sră pơ àr gơnoar atbồ là broă tờm mờ bơta tam gơl pràn nàng ờ mìng tơnguh cồng nha ală broă, mờ gam lơh gơlik bơta ƀuơn ngan rlau jơh ai làng bol, mpồl lơh sa kă bro in. Tơngai lài, bol hi ờ mìng lơh niam broă tă pơgồp jơnau đơs ai đơng lam Kwang àng càr in, mờ gam lam lơh ndrờm bal ală broă lơh atbồ sră pơ àr gơnoar atbồ bè rơndap tap sèng lơngap lơngai mpồl bơtiàn tàm càr”.

Lơh jat Ală jơnau neh lơh nền sồ 6, tàm 3 nam do, càr Dăk Lăk neh lơh gơs broă dờp, lơh sră kăn kươk làng bol crăp chip ai jơh tơl nă làng bol geh tơl bơta in; lơh mat sơnđăn măt  tàm điện tử ai rlau 10 rbô anih lơh broă, mpồl bal in. Tus tŭ do, mờr 10 rbô sră nggal pà sră pà git geh halà ờ lơh tìs adăt boh lam geh lơh bơh tàm VNeID; rlau 90% broă drơng ala dà lơgar pal geh geh lơh tàm internet, lơh gơlik bơta tam gơl bơh “sră nggal pơ àr” tus lơh mờ “ală jơnau yal tơnggĭt sồ”.

Bal mờ broă ndrờm bal, tam pà ală jơnau yal tơnggit jơnau bè làng bol ơm kis, Ală jơnau neh lơh nền sồ 6 gam rơhời dong bơsong sră nggal gơnoar atbồ jat gùng dà lơh ƀuơn, tơrmù dipal mờ loh làng rlau ai làng bol in. Uă broă lơh pa bè yal anih ơm kis bơh phần mềm ASM, tàm tơrbŏ bal bơsong sră pơ àr gơnoar atbồ tàm gah ù tiah, atbồ jơnau tơnggit cau ngui ù bơh Anih ală jơnau yal tơnggit jơnau dà lơgar bè làng bol ơm kis, VNeID halà kiosk drơng broă is tàm ală anih lơh sơnơm neh pơgồp bơnah tơrmù lơyah tŭ jơ kơp gơn, tơrmù ƀà bơta tìp mat tơm.

Jat Đại tá ồng Trần Bình Hưng, Phó Kwang lam bồ Kwang àng càr Dăk Lăk, nàng ală cồng nha do geh gàr kơ̆ sùm, gơnoar broă bơh cau lam bồ ală anih lơh broă, ƀòn lơgar dê geh kuơ dờng ngan: “Cau lam bồ geh gơnoar broă tề lam, ai tơlik lài gùng dà mờ sồr kwang bàng, cau ling kwang àng lam lơh kơnòl broă. Nàng lơh geh cồng nha Ală jơnau lơh nền sồ 6 tàm nam 2025 mờ ală nam pơn jat tai, gơnoar broă bơh cau lam bồ ală anih lơh broă, sàh, sơnah ƀòn dê là kuơmàng ngan”.

Mờ bơta lơh bal ndrờm bal, kràñ cê bơh jơh gùt anih lơh broă cíñ trị dê, tus tŭ do, càr Dăk Lăk neh lơh geh bơta “Tơlir” tàm jơh 102 sàh, sơnah ƀòn; lơh gơs jơh 108 broă jàu jat broă rơndap lơh sồ 2 bơh Mpồl sồr lơh dà lơgar bè lam lơh tam gơl sồ tơrbŏ bal, ndrờm bal, sơrbac mhar mờ geh cồng nha. Dăk Lăk là dùl tàm ală càr sơn rờp bơh gùt lơgar dê lơh gơs kơnòl broă lài mờ tơngai hơ pơrgon, lơh jat jơnau sồr rơndap tap sèng mpồl lơh broă sră pơ àr gơnoar atbồ mờ lơh broă broă lơh gơnoar atbồ ƀòn lơgar 2 kâp. Cồng nha do pơn jat tai đơs nền tam gơl wơl sră pơ àr gơnoar atbồ pơgồp bal mờ Ală jơnau lơh nền sồ 6 ờ mìng là broă lơh bơta chài măi mok mờ gam là bơta tam gơl kuơmàng tàm broă lơh đơng lam broă, pơgồp bơnah tơnguh bơta niam drơng làng bol, mpồl lơh sa kă bro in mờ geh dà lơgar đơs niam ngan.