Dăk Lăk tơrgùm jơh bơta pràn bơsong kal ke tơnơ̆ trồ tiah lơh aniai, đòm jat nùs nhơm tam klac bal, lơh ngan, pơnđơl pràn lơh gơs ală jơnau kờñ lơh geh bè bơtàu tơnguh lơh sa – mpồl bơtiàn, bơta tờm là jơnau sồr gơguh lơh sa 2 nơm sồ tàm nam 2026. Do là gùng dà geh ai tơlik lài tàm Dơ̆ pơrjum dơ̆ 2, Mpồl duh broă Làng bol càr khoă X pa tơn jơh mho ngai 24/12. Tàm dơ̆ pơrjum, ală cau ala mat neh ring bal 24 jơnau lơh nền tàm pơrjum kuơmàng, lơh gơlik bơnàng jă ai bơtàu tơnguh lơh sa – mpồl bơtiàn nam 2026 mờ tơngai bơh nam 2026 tus nam 2031 in, bè: tơn jŏ tơngai ai priă bơcri gơ wèt mờ ală rơndap broă lơh ngui priă bơcri bơh kes priă càr dê; tam pà priă bơcri dà lơgar dê bơ tơl geh jơnau kờñ nam 2025; jơnau cih bè giă ù tàm càr Dăk Lăk…

Đơng lam càr Dăk Lăk sồr bơh tŭ do tus Sa tềp bơhiàn dà lơgar Bính Ngọ 2026, ală gah broă sền gròi tus broă lơh niam broă lơh gàr niam rài kis mpồl bơtiàn, sền gròi rài kis làng bol; lam lơh geh cồng nha ală broă lơh jơnau kờñ dà lơgar bè tơrmù rƀah kơnhăp kơ̆ mờ bơtàu tơnguh lơh sa – mpồl bơtiàn tiah làng bol jơi bơtiàn dồ êt nă cau. Tềng đap mat, kờñ pal tơrgùm dong kờl làng bol lơh wơl broă lơh sa, gàr bè ờs wơl rài kis, iang nùs wă rò sa tềp.