Quý 1 nam 2026, ală kâp ủy tàm càr Dăk Lăk neh lam lơh ndrờm bal kơnòl broă bơtàu tơnguh lơh sa - mpồl bơtiàn, sền gàr dà lơgar - lơngăp lơngai, bơt bơtàu ală anih lơh broă cíñ trị. Tỉñ ủy càr neh ai lơh jat tơngume lơh broă, lam lơh jat ală jơnau lơh nền bơh Đảng dà lơgar mờ jơnau kờñ gơguh lơh sa tơngai bơh nam 2026 tus nam 2030, lơh bơnàng jă nàng ală mpồl lam lơh jat ngan ngồn mờ ală broă rơndap lơh, ală jơnau lơh nền di mờ bơta geh ngan. Broă lơh bơt bơtàu Đảng, rơndap broă kwang bàng, sền sơ wì, jat sền, hòi jà làng bol, tam gơl wơl sră pơ àr gơnoar atbồ geh lam lơh ndrờm bal; broă lơh Mặt trận pơn rơ ngan mờ broă gròi sền sa tềp mờ rơcang tĕ khà.

Đơs pơn dut pơrjum, Phó Ƀí thư Duh broă sùm Tỉñ ủy càr Dăk Lăk mò Cao Thị Hòa An sồr ală kâp ủy jal mhar pồ tơl mpồl kwang bàng tơnơ̆ tĕ khà, ờ lời gơtìp lơyài broă, tơrgùm jơh pràn ai gơguh lơh sa in, ai cồng nha lơh jat broă jàu lơh bơta đo was nàng sền sơ wì pràn jak kwang bàng. Bal mờ hơ̆, lơh mhar ai priă bơcri dà lơgar, tă bơsong bơta gơ kòl, tơn jơh bơta rơndap broă lơh lơyài tơngai hơ pơrgon; gàr kơ̆ bơta duh rơngòt adat boh lam, tơnguh cồng nha lơh broă mpồl kwang bàng lơh broă sră pơ àr gơnoar atbồ, lam lơh tam gơl wơl sră pơ àr gơnoar atbồ, tam gơl sồ; gàr kơ̆ kơljap bơh ƀòn lơgar. Is ồn, càr Dăk Lăk sồr tơrgùm lam lơh ngan ngồn mờ lam lơh jat kràñ cê 9 jơnau lơh nền tàm pơrjum kuơmàng bơh Ƀộ Cíñ trị dê, lơh gơlik bơnàng jă ai gơguh lơh sa mhar, kơnhăp kơ̆ tàm tŭ tơngai pa in.