Jăt jơnau yal, dơ̆ tĕ khà geh bơyai lơh làng bol lơh tờm, di mờ adăt boh lam, gàr niam lơngăp lơngai mờ mùl màl là ngai chờ bơh gùt làng bol dê. Gùt càr geh 2 rơbô 120 tiah đùh sră mờ 2 rơbô 118 mpồl tĕ khà; tàm hơ̆ geh 11 tiah bơyai lơh tĕ khà gờñ bơh ngai 14 nhai 3. Khà cau tĕ khà tàm càr Dăk Lăk lòt đùh sră geh 99,96%.

Cồng nha kờp ing, càr Dăk Lăk neh pồ tơl 15 nă cau ala măt Quốk hội khoă XVI di jăt khà geh ai geh tam pà. Gơwèt mờ Mpồl duh broă Làng bol sàr tơngai lơh broă bơh nam 2026 tus 2031, geh 84 nă cau geh pồ, gàr di mờ broă geh ai, bơnah cau di jăt mờ jơnau geh ai. Tàm kấp sàh, gùt càr geh 2 rơbô 443 nă cau geh pồ tàm Mpồl duh broă Làng bol (ờ tơl 01 nă pơn drờm mờ broă geh ai lài).

Tàm pơrjum, Anih duh broă Tĕ khà càr Dăk Lăk kung yal khà măt ală cau geh pồ cau ala măt Mpồl duh broă Làng bol càr tơngai lơh broă bơh nam 2026 tus 2031 jăt tơl mpồl tĕ khà dê. Broă yal cồng nha geh lơh loh làng, ndrờm bal di jăt mờ jơnau geh ai tàm adăt tĕ khà dê. Tơnơ̆ mờ tŭ geh yal cồng nha tĕ khà, Anih duh broă Tĕ khà càr Dăk Lăk rơ̆p lơh gơs ală sră nggal, sră pơ-àr nàng pơyoa tus ală anih lơh broă Dà lơgar in di mờ jơnau neh geh ai.