Pơrjum sền wơl cồng nha lơh broă bal tàm tơngai bơh nam 2021 tus 2025, mờ ring bal gùng dà broă lơh tàm tơngai bơh nam 2026 tus 2030. Tơngai do, bơta git gơ̆p lơh broă bal đah càr Gia Lai mờ ală càr đah Jum lơgar Lào bơtàu tơnguh tơl ală bơta, geh uă ngan cồng nha mùl màl. Càr Gia Lai neh ai 320 khà priă bơsram, pah nam geh rơlao 100 nă kơnòm bơsram lơgar Lào tus bơsram tàm càr do.

Bè bơcri priă, 15 mpồl lơh sa kă bro càr Gia Lai lơh jăt rơndăp broă tàm đah Jum lơgar Lào mờ kờp jơh priă rơlao 595 tơlăk Dolar Mỹ. Càr kung dong kờl di pơgăp 60 tơmàn đong nàng lơh ală broă lơh gơ̆p bơyô in. Tàm pơrjum, kwang đơng lam càr Gia Lai mờ kwang đơng lam 4 càr đah Jum lơgar Lào neh kĭ hơ Sră nggal kah lơh broă bal tàm tơngai bơh nam 2026 tus 2030, mờ gùng dà broă lơh pơn jăt tai tơnguh lơh broă bal tơl ală bơta, tơrgùm tàm ală gah broă bơto bơtê mờ bơsram, lơh sơnơm, lơh sa suơn sre, kă bro phan, bơcri priă, tìp bal niam chài mờ bơtàu tơnguh lòt nhơl.