Mùl màl, tàm càr Gia Lai geh 674 nơm hìu gơtìp tơrlah tơrlơm jơh tơn kờñ pal geh lơh pa wơl, uă ngan tài gơ rềng bơh càl rbut dờng sồ 13 dê. Jơh khà hìu kờñ lơh pa wơl neh geh sơn đờm lơh. Tàm hơ̆, 451 nơm hìu neh lơh gơs halà mờr lơh gơs. Khà hìu gam wơl gơ ơm uă ngan tàm ală ƀòn ơm kis pa, ù tiah neh geh mờ gam geh lam lơh. Càr Gia Lai hơ pơrgon lơh gơs jơh khà hìu lơh pa lài mờ ngai 25/01/2026. Bè bơnah broă lơh niam wơl hìu ơm, gùt càr geh 31 rbô nơm hìu kờñ pal geh lơh niam wơl. Tus tŭ do, mờr 90% neh lơh gơs. Bơnah gam wơl rơp geh lơh tàm nhai 12 do mờ lơh gơs lài mờ ngai 15/01/2026. Tơngai lam lơh geh đơs là sơrbac mhar.

Đơng lam Anih duh broă Làng bol càr Gia Lai pà git, bơta do gơtùi lơh geh là kơnờm bơta crăp rơcang tơnơ̆ càl rbut dờng sồ 13 tŭ càr lơh wơl broă lơh tơn jơh hìu ing, hìu ồm sèt nhă dà mìu ai ală hìu bơnhă làng bol gơtìp hoàc huơr in, ờ roh tŭ tơngai bơt bơtàu gùng dà broă lơh pa. Càr Gia Lai hơ pơrgon gàr tơl priă jền bơh kes priă rơcang gàr lài dà lơgar dê neh pà, bal mờ priă jền tă pơgồp bơh mpồl bơtiàn dê bơh ală mpồl bal, cau nă să is tă pơgồp bơh Mặt trận dà lơgar Việt Nam mờ ală bơnah priă dipal ndai. Bơdìh mờ priă jền, mpồl ling mờ kwang àng geh gơnoar broă tờm ngan tàm broă dong kờl lơh hìu, jun pơndiang phan lơh hìu.