Kờp jơh priă bơcri tàm 7 nơm hìu bơsram ơm sa bic tơn bàr kấp, kấp dùl mờ kấp bàr tàm ală sàh tiah nhàr lơgar đah măt tơngai Mŭt càr Gia Lai ai jơnau là rơlao 1 rơbô 500 tơmàn đong, geh lơh tàm bă ù ơnàng mờr 52 lồ. Càr ai jơnau kờñ lơh gơs mờ jào jơh 7 nơm hìu bơsram lài mờ ngai 31 nhai 7 nam 2026.

Bŭ lah bè hơ̆, tŭ do, mìng rơ̆p geh dùl hìu bơsram Ia Púch di pal mờ jơnau kờñ geh ai, gam 6 hìu bơsram gam tai ndrờm lơyài pơn drờm mờ broă rơndăp lơh geh ai lài ngan. Geh bơta do tài mpồl pơlam lơh lơh lơyài, ờ tơl cau lơh, bal mờ broă priă phan lơh hìu gơguh uă tàm tơngai pa do.

Bơh dơ̆ lòt sền mùl màl, Ƀí thư Tỉñ ủy càr Gia Lai ồng Thái Đại Ngọc sồr cau tờm bơcri priă mờ ală cau lơh hìu hòi jà tai cau lơh, bơsong bơta kal ke nàng lơh mhar broă lơh hìu bơsram. Ală sờh, gah lơh broă pơgồp bal bơsong kal ke bè phan lơh hìu, gàr niam broă lơh hìu bơsram geh lơh gơs mờ ai ngui di tàm nam bơsram pa. Mờ sền wơl, bơtơl ală broă lơh nàng lơh geh cồng nha broă ngui hìu bơsram, sền kwơ broă tam tờm chi, tiah hìu ơm ai cau pơgru mờ kơnòm bơsram in, bal mờ mpồl lơh kloh siồ siă di pal.