Tơnơ̆ ală dơ̆ mìu dờng, hiòng dà tềng hơđơm rơbàng lam mut tàm thôn Thanh Sơn, sàh Chư A Thai hòr ñhăng ngan. Ồng Vi Văn Trượt, Bí thư Chi bộ mơkung là Lam bồ thôn neh geh mat di tŭ nàng cùp rùp, den sền gĭt tàm mpồl Zalo, tơngkah làng bol kơrhia ngan tàm tŭ lòt rê. Deh nam 1995, geh bơsram cử nhân Adat mờ neh lơh broă tàm kấp sàh, tơnơ̆ tŭ tơmŭt bal, bi Trượt wơl rê at gơnoar lơh broă tàm thôn Thanh Sơn geh tơmŭt bơh 3 thôn yau, mờ 401 hìu bơnhă mờ pơgăp 1 rơbô 760 nă cau, uă ngan là làng bol jơi bơtiàn dồ ết nă cau.

Ù tiah dờng ơnàng, khà kờp làng bol gal lơh lam bồ thôn kơnòm să pal jòi broă lơh mhar rlau mơya kung gam rềp làng bol sơl. Tơnơ̆ rlau 2 nhai dờp kơnòl broă pa, bi Trượt tơnggơs mpồl Zalo tàm tơrbŏ bal mờ rlau 200 hìu bơnhă, gàr niam mpồl is bơh ală anih lơh broă chính trị dê, pơgồp bal mờ Fanpage Facebook mờ loa pờ tơlik jơnau yal nàng mblàng yal jơnau.

Bi gam bơto pơlam làng bol ngui VNeID, tơrgùm sền gàr rềs àr mpồl bơtiàn, sră kham sơm kòp ờ sa priă mờ lơh jat drơng broă dà lơgar tàm internet. Bulah bè hơ̆, tŭ geh broă gơlik geh, bi kung gam tus tơn tàm tơl hìu bơnhă: “Tŭ do, broă lơh tàm thôn uă ngan mờ sồr pal tus tơn nàng gĭt loh kal ke bơh làng bol dê mbè lơi den hơ̆ sồng lơh sir geh broă lơh; den pal pơyoa jơnau yal tus kấp hơ đang halà dờp sră nggal sồr pal lơh sir tàm măi vi tính lơm. Tŭ do, añ kung gam ngui phan ngui nàng bơto pơlam làng bol tơrgùm jơnau yal tàm VneID nàng làng bol in gĭt rơ hời”.

Tơnơ̆ tŭ tơmŭt bal, thôn D’Rốc, sàh Chư A Thai geh rlau 500 hìu bơnhă, mờ 8 jơi bơtiàn ơm kis bal. Ồng Nguyễn Công Quân, cau neh geh uă nam lơh lam bồ thôn mờ Đơng lam bồ Mpồl Cau ling yau, pơn jat tai geh làng bol pin dờn jàu kơnòl broă lơh lam bồ thôn pa. Gĭt loh làng bol tơl tiah làng bol ơm kis, ală tiah geh pơhìn tơrlah ù mờ ală gơl gùng sùm gơtìp ngơr bam dà tŭ mìu dờng, ồng rcang lài lòt sền, tơngkah lài nàng làng bol in rcang lài pleh. “Pơn yơu bè Cơldŭ Lơh sa pơyoa jơnau yal bè jơnau kờp dŭ lài trồ tiah den he mblàng yal tơn, pơnđàng nàng làng bol in gĭt ală bơta. Tàm broă lơh sa suơn sre rơ̆p ƀuơn ngan tŭ he gĭt loh jơnau yal di ngan. Dilah kờñ sih tam kòi den làng bol rơ̆p gơ jal sih tam mơ nàng gơ căt cồng halà ơm ing wơl”.

Bơh 23 thôn yau, sàh Chư A Thai neh rơndăp tăp sèng gam 13 thôn, geh 8 lam bồ thôn mờ 5 Bí thư Chi bộ mơkung là lam bồ thôn. Jơh ală lam bồ thôn tơnơ̆ rơndăp tăp sèng ndrờm jơh bơsram kấp pe rlau hơđang, geh bơta chài ngui măi tìñ mờ điện thoại ngăc ngar. Tơnơ̆ tŭ pồ tơl mpồl kwang bàng lơh broă, sàh pơn jat tai rơndăp tăp sèng bơta chài mblàng yal, tơn jơh bơta tàm gơ jrañ, kờp sền hìu bơnhă rƀah, atbồ rơndăp tăp sèng bơt bơtàu mờ sền gàr lơngăp lơngai; mơkung lơh kơ̆ kơl jăp bơta tàm pơgồp bal đah lam bồ thôn mờ Chi ủy, Mpồl Lơh broă Mặt trận, Kwang àng sàh mờ ală mpồl cau. Ồng Nguyễn Hữu Khóa, Phó Bí thư Đảng ủy, Phó Chủ tịch Anih duh broă Làng bol sàh Chư A Thai pà gĭt, mpồl do gam dong kờl tơn làng bol gơ dờp mờ broă lơh bơsong broă lơh tàm internet: “Ală lam bồ thôn tơnơ̆ tŭ tơmŭt bal neh rcang lài gĭt ală bơta, ngui điện thoại ngăc ngar mờ ală mpồl Zalo, ală bơnàng jă nàng gĭt loh broă lơh. Mpồl lam bồ thôn kung jơh nùs pơgồp bal gơ gơs cau tàm mpồl tam gơl sồ dong làng bol tơrgùm jơnau yal tơngĭt tơmut tàm tài khoản VneID, drơng broă dà lơgar tàm internet, tơm priă bơh tàm internet, gĭt ală tơngume bơsram”.

Tàm gùt càr Gia Lai, khà thôn, ƀòn, jơnum làng bol tiah drà neh gơmù rlau 48% tơnơ̆ rơndăp tăp sèng. Tŭ do, càr geh 1 rơbô 400 nă lam bồ thôn, lam bồ jơnum làng bol tiah drà. Tàm hơ̆ 183 nă cau at gơnoar broă bal mờ Bí thư Chi bộ. Pal sền gròi ngan là, geh 10 nă cau bơsram rlau đại học, geh 1 nă tiến sìh mờ 9 nă cau jơh bơsram đại học ndai. Ồng Nguyễn Thanh Vũ, Phó Kwang lam bồ Sờh Broă dơlam is càr dê pà gĭt, càr gam lơh ngan rơndăp tăp sèng mpồl cau gĭt wă, bơngă pin dờn mờ bơta pràn jak tam gơl sồ bơh mpồl lam bồ thôn, lam bồ jơnum drà nàng mpồl lam bồ thôn, lam bồ jơnum làng bol tiah drà lơh geh niam jơnau sồr kơnòl broă tàm bơta pa. “Tơnơ̆ rơndăp tăp sèng, mpồl kwang bàng do ngai sơlơ geh rơndăp tăp sèng hời rơ hời. Jat jơnau sồr bơh Mpồl rơndăp broă Dà lơgar mờ bơh càr dê den kờñ pal geh bơta chài gĭt mờ măi mok yal tơngĭt jơnau bơh khi dê pal mhar ngan. Tŭ do cơldŭ lơh broă điện tử bơh càr dê tàm tơrbŏ bal mờ thôn, pal chài ngan măi mok yal tơngĭt jơnau pa tơmŭt tàm phầm mềm do. Den tàng, jơnau sồr ai tơlik là khi pal gĭt wă loh ngan bè tam gơl sồ”.

Tơnơ̆ rơndăp tăp sèng, ală ù tiah dờng ơnàng gam ơn tàm pơnì lam bồ thôn, lam bồ jơnum làng bol tiah drà uă kơnòl rlau. Tŭ geh rơndăp tăp sèng bè bơta chài mờ tam gơl pa broă lơh, khi rơ̆p pơn jat tai là rƀàng tàm tơrbŏ bal ờ gơtùi ờ geh đah gơnoar atbồ mờ làng bol.