Tam lơh tàm Trung Đông di gơlan lơh priă xăng jờu bal mờ priă logistics pơn jăt tai gơguh, lơh gơjăt bal priă tăc tàm broă lơh sa bơh mpồl lơh sa kă bro dê gơguh sơl. Bơta di gơlan gơtìp koh gơl ờ uă gơl gùng pơn diang phan tàm dà lềng ală lơgar dê kung gơrềng tus mờ broă blơi phan sơl, lơh gơrềng tơn tus mờ ală gah lơh sa tờm càr Khánh Hoà dê bè lơh ơhò, lơh gơs phan geh lơh bơh phan tàm dà, pơn diang phan tàm gùng dà lềng mờ lòt nhơl - broă lơh drơng ala. Tềng đăp mờ tam gơl bơh drà kă bro dunia dê, uă mpồl lơh sa kă bro tàm càr gam rơcang gơdờp bal, lơh geh uă bơta drà kă bro mờ tơnguh uă bơta kwơ phan geh lơh.

Mò Trịnh Thị Hồng Vân, Ƀí thư Đảng ủy, Củ tịc Mpồl duh broă Kông ty Lơh kơnòl broă dùl nă să isYến sào Khánh Hoà pà git, mpồl lơh sa kă bro gam lơh pràn broă tơrgùm priă tă, rề ơnàng broă tăc phan tàm lơgar mờ ală drà kă bro dờng. “Bơdìh mờ tăc barbèt rơsòn, bol añ rơ̆p tơnguh broă bơtàu tơnguh ală bơta phan tơnơ̆ mờ tŭ lơh gơs, bơh tŭ hơ̆ tơnguh bơta kwơ gơguh ai càr in, ai mpồl lơh sa kă bro in. Bol añ rơ̆p pơgồp bal mờ ală tập đoàn dờng tàm lơgar Lo nàng bơtàu tơnguh”.

Jăt ồng Nguyễn Sanh Đương, Phó Kwang lam bồ Sờh Lơh sa mờ măi mok Kă bro phan càr Khánh Hoà yal, bơta ờ niam tàm Trung Đông gam lơh gơrềng tus mờ broă lơh sa, kă bro bơh uă mpồl lơh sa kă bro tàm càr dê. Tŭ do, khà priă tăc phan mờ lơgar bơdìh càr Khánh Hoà tus tàm tiah do geh di pơgăp 210 tơlăk Dolar Mỹ, geh mờr 10% khà priă tăc phan mờ lơgar bơdìh dê, tàm tŭ blơi phan bơh lơgar bơdìh geh di pơgăp 10 tơlăk Dolar Mỹ. Priă tăc xăng jờu gơguh neh lơh ală gah lơh sa geh bơta pràn bè lơh ơhò, lơh gơs phan bơh phan tàm dà, lòt nhơl - broă lơh drơng ala kong mờ bơta tă priă uă tàm broă lơh mờ pơn diang phan gơguh. Tềng đăp mờ bơta do, gah lơh sa mờ măi mok kă bro phan gam pơgồp bal mờ Mpồl atbồ Tiah lơh sa mờ Tiah lơh sa mờ Măi mok càr Khánh Hoà dong kờl mpồl lơh sa kă bro bơsong kal ke, lơh pràn ală rơndăp broă lơh năng lượng mờ lơh sa mờ măi mok nàng bơtơl bơta pràn gơguh lơh sa.

Ồng Nguyễn Sanh Đương pà git: “Nàng bơtơl, gah do tơrgùm dong kờl cau bơcri priă. Tàm hơ̆ uă ngan là gơwèt mờ 2 rơndăp broă lơh ồs đèng măt tơngai Phước Thái 2, Phước Thái 3, lơh ngan geh lơh broă tàm nhai 3, lơh geh ồs đèng ngui. Mờ pơgồp bal mờ ală sờh, gah lơh broă nàng dong kờl ală cau bơcri priă lơh sa mờ măi mok, bơsong kal ke, lơh mhar broă lơh”.

Ală tam gơl bơh lơh sa tàm dunia pà gŏ bơta kwơ màng bơh broă bơtàu tơnguh lơh sa dà lềng mờ mpồl logistics pa dê. Mờ bơta pràn anih ơhò ơm dà lềng jrô, tàm hơ̆ uă ngan tàm Vân Phong, càr Khánh Hoà gam rơhời lơh geh gơnoar tờm tàm broă pơn diang phan tàm gùng dà lềng mờ logistics tàm tiah đah Jum tàm Gùl lơgar. Tŭ mpồl ai phan tàm gùt plai ù lơh geh wơl, broă bơcri priă lơh ndrờm bal phan bơna anih ơhò ơm dà lềng, tiah lơh sa mờ măi mok mờ broă lơh drơng ala logistics rơ̆p dong kờl càr tơnguh uă bơta pràn gơdờp bal tềng đăp mờ ală bơta tam gơl bơh bơdìh dê. Ồng Nguyễn Thanh Hà, Phó Củ tịc Anih duh broă Làng bol càr Khánh Hoà pà git, nàng gàr jơnau kờñ gơguh lơh sa bàr sồ, càr gam sền wơl khà broă geh ai, bơsong kal ke ai mpồl lơh sa kă bro in mờ lơh mhar ală rơndăp broă lơh tờm. “Bơta pràn tờm gơguh lơh sa nam 2026 kung gam là bơcri priă dà lơgar. Bol añ pal sền gròi, tam pà bal priă, bơcri priă dà lơgar bơh bồ nam tơn. Do là broă lơh kwơ màng ngan, ai geh jơnau kờñ gơguh lơh sa 2 sồ càr Khánh Hoà dê tàm nam do. Tŭ do gam rơlao 4 rơbô tơmàn đong pal lơh gơs broă tam pà priă mùl màl”.

Tàm 2 nhai bồ nam 2026, càr Khánh Hoà kung gam geh khà gơguh lơh sa niam. Tă tàm kes priă geh rơlao 11 rơbô 600 tơmàn đong, ndrờm mờ pơgăp 30% khà priă Dà lơgar jào mờ gơguh 1,7 dơ̆ pơn drờm mờ tŭ do nam lài. Tàm bơta lơh sa dunia gam uă bơta tơngŏ ờ kơl jăp, broă rơcang đơng lam, lơh geh uă bơta phan kă bro tàm drà kă bro mờ tơnguh bơta pràn lơh sa dà lềng là gùng dà broă lơh nàng càr Khánh Hoà gơtùi gàr kơl jăp broă bơtàu tơnguh, ai geh bơnàng jă lơh jăt jơnau kờñ gơguh lơh sa kơl jăp tàm nam 2026 mờ ală nam pơn jăt tai.