Bal mờ broă tơng gơs Anih duh broă tĕ khà cau ala mat Quôk hội khoă XVI mờ cau ala mat Mpồl duh broă Làng bol càr khoă XI, jơh ală sàh, sơnah ƀòn, tiah is ồn tàm càr neh tơng gơs Anih duh broă tĕ khà mờ bơt bơtàu broă rơndap lơh bơyai lơh tĕ khà di mờ tŭ tơngai hơ pơrgon. Anih duh broă Mặt trận dà lơgar Việt Nam càr neh bơyai lơh Pơrjum cribơyai dơ̆ 1, ring bal khà, rơndap tap sèng mờ khà cau tơlik mat tĕ khà.

Jat tam pà, càr Lâm Đồng geh 17 nă cau ala mat Quôk hội; yal tơnggit 153 nă cau tơlik mat tĕ khà Mpồl duh broă Làng bol càr nàng pồ 85 nă cau ala mat. Tàm kâp sàh, Mpồl Duh broă sùm Anih duh broă Mặt trận dà lơgar Việt Nam ală sàh, sơnah ƀòn, tiah is ồn neh lơh gơs broă cribơyai dơ̆ 1. Mờ bơta rơcang lài nền nòn, ndrờm bal, càr Lâm Đồng rơhời gàr dơ̆ tĕ khà ngan ngồn gơ gơs là ngai chờ bơh jơh gùt làng bol dê, ngui niam gơnoar lơh tờm mờ bơta pràn tam klac dờng tàm làng bol.