Tus tŭ do, Anih duh broă Tĕ khà càr Lâm Đồng tơlik geh 159 pang sră sồr lơh nàng pơyoa tus 124 sàh, sơnah ƀòn bal mờ tiah is ồn, bơto sồr mùl màl tus tơl tơngu me, gàr niam broă lơh ring bal, di mờ jơnau geh ai bơh Dà lơgar dê bal mờ jơh ală kơnòl broă geh lơh gơs lài mờ tơngai geh ai.

Ală anih lơh broă tờm lơh pràn broă tam gơl sồ, ngui măi mok yal tơngit tàm broă tĕ khà. Broă lip sră nggal drơng tĕ khà geh lơh jal mhar, di. Jơh ală khà măt cau tơlik măt tĕ khà jăt tơl mpồl tĕ khà, yal tơrgùm bè rài kis broă lơh mờ 20 bơta sră nggal gơrềng bal mờ kờp jơh rơlao 6 tơlăk 600 rơbô pang neh geh lip, jào tơl tus 124 sàh, sơnah ƀòn bal mờ tiah is ồn tàm càr in. Sờh Kơnòl broă dơlam is càr Lâm Đồng neh bơyai lơh pờ ală ơdŭ bơto ai ală mpồl tĕ khà tàm tơl sàh, sơnah ƀòn in mờ gam pơn jăt tai bơto nền nòn ai ală cau tàm mpồl mờ 2 rơbô 301 Mpồl tĕ khà in.