Tàm thôn Kon Tun, sàh Tu Mơ Rông, càr Quảng Ngãi, ồng A Hai (50 sơnam) là cau lòt lài tàm tàm gơl pa broă lơh nàng bơt bơtàu lơh sa hìu bơnhă. Tŭ do hìu bơnhă ồng atbồ pơgăp 20 lồ ù, tàm hơ̆ rlau 10 lồ brê tam, tờm ngan là tờm chi Gáo rơmĭt. Bơdìh hơ̆, ồng tam tàm bơrlŭ bal mờ ală bơta tờm chi bời lời, hông, xà cừ mờ pơgồp bal ròng kơn rồ dra tềng hơ đơm mƀur chi brê, bơh hơ̆ tơnguh priă lơh geh. Ờ mìng lơh sa jak, ồng A Hai gam jơh nùs hòi jà làng bol tam gơl bồ tơngoh kơlôi sơnơng lơh sa, tam gơl bơh tam phan lơyah tơngai tus tam phan brê jŏ jòng pơgồp bal mờ sền gàr tiah ơm kis:“Añ pơnđơl pràn lơh ngan lơh broă sa nàng bơtàu tơnguh lơh sa. Tŭ añ lơh geh cồng nha den oh kòn hơ̆ sồng lơh jat bal. Đảng viên pal lơh krơh lài, pal lòt lài tàm bơtàu tơnguh lơh sa. Tàm do, he hòi jà làng bol tơrgùm lơh  broă sa, lùp bơsram, tam pà bal mờ gơ̆p lơh geh cồng nha”.

Kung tàm sàh Tu Mơ Rông, bi Y Khương (36 sơnam), Lam bồ mơkung là Ƀí thư Ci ƀộ thôn Ngọc Leng là dùl tàm ală kwang bàng ƀòn lơgar pơn rơ jak tàm broă hòi jà làng bol tam gơl rơndăp tăp sèng phan tam, hời rơ hời tơnguh uă priă lơh geh, bơtàu tơguh niam rài kis. Bơh nam 2014, bi Y Khương khin cha tam kơphê mờ bă ù ơnàng 6 sào. Jơh sơntìl kơphê geh sàh dong kờl, kwang bàng gah broă lơh sa suơn sre bơto pơlam tơn bơta chài tam phan bơh broă tờ bơtô, sih phơng tus sơng ka sền gàr. Tơnơ̆ rlau 1 nam, tờm kơphê dờng gơs niam. Bi Y Khương kơlôi là đảng viên pal lơh krơh lài, lòt lài tàm bơtàu tơnguh lơh sa nàng làng bol in lơh jat bal:“Mblàng yal, hòi jà làng bol tam gơl bơta kơlôi sơnơng, broă lơh. Tờm kơphê ai priă lơh geh uă, làng bol gŏ geh cồng nha kung khin cha lơh jat sơl. Lài do tam bùm blàng mơya chơ̆t uă ngan. Bơh nam 2024, añ hòi jà làng bol tam kơphê. Nam 2024, thông Ngọc Leng geh 24 hìu bơnhă tus bal; tus nam 2025 geh tai 25 hìu bơnhă tam, priă lơh geh bơh tam kơphê uă den tàng làng bol sơlơ jơh nùs lơh ngan lơh tai”.

Bơh ală broă lơh lơh sa geh ngan tàm ƀòn lơgar, nùs nhơm ai Jơnau lơh nền tàm pơrjum mut tàm rài kis tàm sàh Tu Mơ Rông hời rơ hời geh lơh ngan ngồn. Tiah do sền gĭt bơtàu tơnguh lơh sa là kơnòl broă tờm, pơgồp bal kơ̆ mờ jơnau kờñ tơrmù rƀah kơnhăp kơ̆ mờ bơt bơtàu ƀòn lơgar pa.

Tàm tơngai lơh broă bơh nam 2025 - 2030, sàh Tu Mơ Rông ai jơnau kờñ tơnguh priă lơh geh kờp bal tơl nă cau gơguh uă ngan rlau jơh 63 tơlak đong dùl nam. Nàng lơh geh jơnau kờñ do, sàh rơwah broă lơh sa suơn sre lơh gùng lòt tờm, tàm hơ̆ tờm kơphê geh sền gĭt là phan tam tờm. Tàm 2 nam sơnrờp tơngai lơh broă, sàh pơn đơl pràn lơh ngan bơtàu tơnguh pơgăp 300 lồ tam tờm kơphê, hời rơ hời lơh geh tiah tam phan tơrgùm bal. Ồng Võ Trung Mạnh, Ƀí thư Đảng ủy sàh Tu Mơ Rông, càr Quảng Ngãi pà gĭt, tiah do gam bơtàu tơnguh bơt bơtàu mã tiah tam phan mờ Ală jơnau neh lơh nền mat kă bro kơphê Tu Mơ Rông, wèt tus lơh geh jơnau kờñ tăc phan mờ lơgar ndai: “Dùl tàm 6 kơnòl broă tờm, tam gơl pràn bơh sàh dê là đơng lam kràñ cê jơh nùs broă tamgơl bơta kơlôi sơnơng, broă lơh, sơnđờm bơh kwang bàng, đảng viên. Kwang bàng, đảng viên ờ tam cah is Đảng ủy, Anih duh broă Mặt trận Dà lơgar Việt Nam sàh halà Anih duh broă Làng bol sàh Tu Mơ Rông ndrờm tus bal tơn tơl broă lơh geh ngan, bơh ờng phan tam, bơto pơlam tus lòt sền, sồr lơh ngan. Lòt sền tàm do là lơh bal, jat sền bal, ờ gŏ di pal kơ̆p lơh jơh hơ̆ sồng lòt sền ờ”.

Ală cồng nha mờ broă lơh bơh ƀòn lơgar tàm Tu Mơ Rông là cơng tàng niam ngan ai nùs nhơm ai Jơnau lơh nền tàm pơrjum bơh Pơrjum dờng cau ala mat Đảng ƀộ càr Quảng Ngãi dơ̆ I, tơngai lơh broă bơh 2025 – 2030 mut tàm rài kis. Ală tiah ndrờm pơgồp bal mờ bơtàu tơnguh lơh sa bal mờ bơtàu tơnguh rài kis làng bol, ai làng bol lơh anih tờm, ƀòn lơgar lơh bơnàng jă nàng lam Quảng Ngãi bơtàu tơnguh mhar, kơnhăp kơ̆ tàm tơngai pa.

Tỉñ ủy càr Quảng Ngãi neh sền gĭt broă lơh bơsram lơh jat, mblàng yal là kơnòl broă tờm, lam lơh dồ ròt bal Jơnau lơh nền tàm pơrjum dê bơh càr tus ƀòn lơgar. Ồng Hồ Văn Niên, Ƀí thư Tỉñ ủy càr Quảng Ngãi sồr ală kấp ủy, gơnoar atbồ mhar bơt bơtàu broă lơh lơh broă, broă rơndăp lơh lơh jat ngan ngồn, pơgồp bal mờ kơnòl cau lam ƀồ dê:“Lơh mhar tŭ tơngai lơh jat ală rơndăp broă lơh tờm, geh bơta tàm tơrbŏ bal, lơh bơta gơn kơnờm lơh gơrề uă, sơlơ tơnguh tai bơtàu tơnguh lơh sa- mpồl bơtiàn. Kờp sền, lòt sền ală rơndăp broă lơh gam gơ kờl jŏ jòng nàng tơrgùm tă bơsong kal ke, kòl yan, lơh mhar tŭ tơngai mut lơh halà bơsong jat jơnau sồr, pleh lơh pờ hì pơhà, hoàc huơr”.