Mò Cao Thị Nỷ, kis tàm thôn Suối Cá, sàh Khánh Trung, kơnhoàl Khánh Vĩnh pa rê ơm tàm hìu pa geh lơh nàng ala mờ hìu mpàn neh klar lài do. Ùr bơklao mò Nỷ ờ geh ù lơh sa, lòt lơh broă ơpah jăt kàl, kòn gam dềt gơtìp kòp, gơwèt hìu rơƀah tàm sàh Khánh Trung. Bơh nam 2023, dùl nă đảng viên là kwang bàng tờm sàh Khánh Trung geh Đảng ủy sàh sồr dong kờl hìu mò Nỷ brồ guh lik klàs rơƀah. Mò Nỷ geh cau đảng viên do ai tơl bơta niam nàng lòt bơsram broă trŭ sa, geh dong kờl 60 tơlăk đong nàng lơh hìu pa. Bơsram broă lơh neh jơh, bơdìh mờ broă kă bro, mò Nỷ gam geh yal nàng lơh cau trŭ sa tàm hìu bơsram sàh dê, hìu pa geh lơh dờng ơnàng, neh lơh gơs dong kờl hìu nhă kis kơ̆ kơl jăp. Mò Cao Thị Nỷ tơlik nùs nhơm chờ hờp: “Ùr bơklao añ geh rài kis gơtìp kal ke, lơh ngan lơh broă nàng ròng kòn klao tơnơ̆ gơtìp kòp, gam cèng kòn lòt reh tai. Đah Mặt trận Dà lơgar sàh dong kờl lơh hìu ơm añ in, geh lòt bơsram broă lơh rê mờ geh broă lơh nàng kă bro. neh geh hìu, geh broă lơh, bol añ lơh ngan nàng lik klàs rơƀah”.

Đảng ƀộ sàh Khánh Trung, kơnhoàl Khánh Vĩnh, càr Khánh Hoà geh rơlao 100 nă đảng viên, ờ gam geh đảng viên lơi gơwèt hìu rơƀah. Sàh do geh mờr 90% làng bol jơi bơtiàn ờ gal cau, rài kis gam uă kal ke. Đảng ủy sàh neh hòi jà jơh ală cau tàm mpồl cíñ trị tus bal dong kờl ală hìu gơtìp rơƀah, pa lik klàs rơƀah. Pah nam, Đảng ủy sàh geh Jơnau lơh nền sồr đảng viên dong kờl hìu rơƀah lik klàs rơƀah. Tàm tơngu me sền wơl, tam pà ală khà broă hìu rơƀah, Đảng ủy sàh sồr tam pà tus tơl nă đảng viên mùl màl. Mò Cao Thị Thanh, Ƀí thư Đảng ủy sàh Khánh Trung, kơnhoàl Khánh Vĩnh, càr Khánh Hoà pà git, nam 2024, sàh neh geh rơlao 90 hìu lik klàs rơƀah, tàm hơ̆ đảng viên neh hòi jà lơh geh 11 nơm hìu sèt nàng dong kờl làng bol. "Tơl nă đảng viên pal geh 1 broă tơrlòng lơh nàng dong kờl hìu rơƀah, hơ̆ sồng lơh gơs kơnòl broă. Mùl màl, bơh kes priă Măt trận Dà lơgar ờ gŏ di ai jơh hìu rơƀah gùt kơnhoàl in ờ, pal rơwah, pal sền. Den tàng, đảng viên pal lam lài dan geh hìu nàng ai làng bol in. Đảng viên geh tơl ngui tơl sa, git lơh sa sùm tus ală hìu rơƀah nàng bơto sồr tàm broă ròng phan, tam phan. Ha là bơta kal ke rơlao den pà sơntìl nàng ròng, hòi jà bơh ală cau geh nùs nhơm niam dong kờl ai sur, be, kơnrồ nàng ròng kung niam sơl”.

Ală nam do, uă đảng viên làng bol jơi bơtiàn ờ gal cau tàm càr Khánh Hoà neh ngui gơnoar lam lài tàm broă lơh, tơnguh uă kơnòl “đảng viên lam lài, ƀòn lơgar jăt bal”. Tàm hơ̆, uă đảng viên neh tơnguh nùs nhơm geh kơnòl, lam lài tàm broă bơtàu tơnguh lơh sa, tơn jơh jơgloh tơrmù rơƀah, bơ̆t bơtàu rài kis niam chài, gàr niam lơngăp lơngai tàm ƀòn lơgar. Mò Trần Thị Việt, cau geh bơngă pin dờn pơnrơ ngan, 69 sơnam, Ƀí thư Ci ƀộ thôn Hòn Dù, sàh Khánh Nam, kơnhoàl Khánh Vĩnh pà git, uă nam lài, hìu nhă mò lam lài tam tào, lơh sre, ròng oh kòn lòt bơsram tus gùng tus dà.

Bơdìh hơ̆ tai, hìu mò kung lam lài tàm mpồl bơtiàn bè lơh jăt niam broă khà kờp làng bol, ờ tìs tàm broă bao gờñ, dong kờl ală hìu gơtìp kal ke brồ guh. “Pal geh bơngă pin dờn tàm mpồl bơtiàn, mờ dong kờl làng bol den tàng he đơs hơ̆ sồng cau iăt, di lah ờ là broă lơh geh cau ờ gŏ dờn ờ. Làng bol gŏ tàm đảng geh lòt pơrjum, pin dờn rơlao, chờ hờp rơlao. Cau geh mŭt đảng pơnyờ să là đảng viên, git jơnau nàng lơh sa, bơtàu tơnguh lơh sa hìu nhă, lik klàs rơƀah, ròng oh kòn gơs cau niam gơlòng sồr”.

Bơh bồ tơngai lơh broă tus jơh nam 2024, Đảng ƀộ kơnhoàl Khánh Sơn, càr Khánh Hoà neh tơmŭt 353 nă đảng viên, sơrlèt mờ jơnau tàm Jơnau lơh nền bơh Pơrjum dờng Đảng ƀộ kơnhoàl geh ai, tơnguh khà đảng viên tàm gùt Đảng ƀộ kơnhoàl tus rơlao 1 rơbô 600 nă đảng viên. Tàm hơ̆ đảng viên là cau jơi bơtiàn ờ gal cau geh mờr 50%. Ồng Bùi Hoài Nam, Ƀí thư Huyện ủy kơnhoàl Khánh Sơn pà git, geh uă kra ƀòn, cau geh bơngă pin dờn tàm jơi bơtiàn ờ gal cau là đảng viên. Ală cau do ngui geh nùs nhơm lam lài tàm broă lơh jăt niam ală gùng dà broă lơh bơh Đảng mờ adăt boh lam bơh Dà lơgar dê kung bè bơtàu tơnguh lơh sa, tơn jơh jơgloh tơrmù rơƀah. “Đảng viên là ală cau kra ƀòn, kwang atbồ ƀòn geh jơnau đơs kwơ màng ngan, neh yal di tŭ ală gùng dà broă lơh bơh Đảng dê, dong kờl bal bơtàu tơnguh lơh sa, dong kờl bal lik klàs rơƀah. Làng bol tàm ƀòn lơgar gŏ geh gơnoar bơh đảng viên, bơh tŭ hơ̆ geh broă lơh ngan, kơ̆p kờñ mŭt tàm mpồl Đảng, pơn jăt tai lơh broă, brồ guh lơh pas di pal tàm ƀòn lơgar Khánh Sơn dê”.