Pơgru Lê Hiếu Vy, Ƀí thư Đoàn Hìu bơsram kấp pe Ngô Gia Tự (sơnah ƀòn Phú Yên) là ala măt mìng dùl lơm càr Dăk Lăk dê geh yal nàng dờp khà jờng Lý Tự Trọng nam 2026. Pơgru do sùm rơcang lài tam gơl pa broă lơh nàng hòi jà, tơrgùm gal đoàn viên, kơnòm bơsram tus bal. Tàm dơ̆ mìu dà tih dà cò dờng ngan bơh lài tus tŭ do lồi nam 2025, ờ ngòt bơta ngòt rơngơ̆t, pơgru Vy neh tơrgùm rơlao 30 nă đoàn viên mŭt tàm ală tiah gơtìp koh gơl is nàng jun phan dong kờl tus mờ làng bol gam gơtìp jơgloh mờ mrềt noăt. Nùs nhơm lam lài, lơh broă bơh pơgru dê ờ mìng dong kờl làng bol sơrlèt mờ kal ke mờ gam lơh geh uă bơta pràn kơl dang tàm kơnòm bơsram, lơh geh nùs nhơm git geh kơnòl bal mờ nùs nhơm tam pà bal.

Gơwèt mờ pơgru Vy dê, lơh geh jơnau kờñ lơh broă bal mờ lơh broă mờ ơruh pơnu là broă lơh nàng geh ală cau jăk geh kơnòl uă, geh nùs nhơm tàm gơboh bal, bal mờ nùs nhơm kờñ lơh broă tàm tơl nă kơnòm bơsram mờ ală bơyô kơnòm să dê. “Tŭ lơh broă bal den he lơh broă bal mờ kơnòm bơsram. Gŏ să tờm he lơh bal den lơh pràn geh nùs nhơm lơh broă is, lơh is, lam lài is bơh kơnòm bơsram dê, hơ̆ là he pơlam ờ gŏ di là he pal sồr lơh. Kơnòm bơsram rơ̆p dan cih măt, mờ tŭ lơi kung dan cih măt mŭt lơh broă bal uă rơlao mờ jơnau geh ai. Tơl broă lơh rơ̆p là dùl bơta pal kah ngan gơwèt mờ ală bol oh dê”.

Kơnờm mờ broă lơh bơceh lơh, geh cồng nha, tơngai bơh nam 2020 tus 2025, Đoàn Hìu sơnơm kấp pe Ngô Gia Tự geh 8 nă kơnòm bơsram pơnyờ să geh mŭt Đảng. Bal mờ hìu bơsram, broă đoàn gam geh lơh tàm càr Dăk Lăk mờ bơta tờm là pơgồp broă lơh mờ jơnau kờñ mùl màl tàm tơl tiah dê. Tàm sơnah ƀòn Buôn Ma Thuột, tơnơ̆ mờ tŭ mŭt lơh gơnoar atbồ bàr kấp, đoàn viên ơruh pơnu geh tam pà kơnòl mùl màl, tus bal dong kờl làng bol git ngui broă lơh drơng ala tàm internet, bơto sồr nàng git ngui măi mok sồ tơn tàm tơl ƀòn ơm kis. Jăt lŏ Lê Thị Anh Trâm, Ƀí thư Đoàn sơnah ƀòn Buôn Ma Thuột đơs, ơruh pơnu ờ lơh ala, mờ bơto sồr nàng làng bol gơtùi lơh is, rơcang lài tàm broă lơh măi mok sồ. “Tàm tơngai pa do den đoàn sơnah ƀòn kung neh lơh geh mpồl tus tơl dong kờl tàm Anih tờm drơng ala sră nggal dà lơgar kung bè lơh uă tus tàm 89 mpồl ƀòn bal mờ ală ƀòn. Ờ ơm wơl tàm broă dong kờl mờ wèt tus tàm broă lơh broă bal mờ làng bol nàng bơto sồr làng bol in git măi mok sồ, nàng làng bol gơtùi rơcang lài is lơh gơtùi ală sră nggal tàm internet”.

Tàm bơta lơh jăt broă lơh gơnoar atbồ ƀòn lơgar bàr kấp, jơnau sồr geh ai gơwèt mờ mpồl lơh broă Đoàn là pal rơwah di broă, jào di cau, tơnguh gơnoar ơruh pơnu bơh ƀòn lơgar tơn. Tŭ kơnòl broă geh ai lơh mùl màl, broă lơh ờ gam gơtìp rah rài tam, mờ geh pơgồp bal mờ ală bơnah broă mùl màl. Mìng tàm tơngai ờ jŏ, ală mpồl ơruh pơnu lơh broă nùs nhơm dong kờl is càr Dăk Lăk neh dong kờl git nđờ jơ̆t dơ̆ làng bol in git ngui broă lơh drơng ala dà lơgar dê mờ ală măi mok sồ. Do là mpồl lơh broă tơrbŏ bal kwơ màng đah gơnoar atbồ sồ mờ làng bol, tàm hơ̆ uă ngan là tàm tiah ngài. Bi Lương Minh Tùng, Ƀí thư Tỉñ đoàn càr Dăk Lăk đơs nền, nàng di pal mờ jơnau kờñ pa, mpồl Đoàn pal pơn jăt tai tam gơl pa gùng dà broă lơh, di pal mờ mùl màl. “Mpồl đoàn pal geh tam gơl tờm ngan. Kwang bàng đoàn tàm ală ƀòn pal ndrờm bal lơh jăt kơnòl broă cíñ trị tàm ƀòn lơgar. Nam do den kwang bàng đoàn kấp sàh rơwah ală tơngu me tờm, di pal mờ tàm mùl màl bơh tơl tiah dê, tàm hơ̆ uă ngan là tơnơ̆ mờ tŭ tơmŭt bal, nàng tàm tơngu me dờp geh ală broă kal ke, ală broă pal geh gơnoar ơruh pơnu dê tàm gơnoar atbồ ƀòn lơgar 2 kấp”.

Ồng Y Giang Gry Niê Knơng, Phó Ƀí thư Tỉñ ủy, Củ tịc Anih duh broă Mặt trận Dà lơgar Việt Nam càr Dăk Lăk đơs là, tàm bơta pa, mpồl Đoàn pal pơn jăt tai tam gơl pa pràn kơl dang gùng dà broă lơh, gơdờp mờ rài bơtàu tơnguh tŭ do dê. Tàm hơ̆ uă ngan là đoàn viên, ơruh pơnu pal là mpồl lam lài tàm broă tam gơl pa bơceh lơh mờ tam gơl sồ, ală gah broă geh kwơ tờm gơwèt mờ broă bơtàu tơnguh càr, dà lơgar dê. Mờ jơnau tơl pràn gĭt wă mhar jơnau gĭt wă mờ măi mok pa, ơruh pơnu ngan là mpồl gơtùi gờñ ai ală jơnau kơlôi lơh bơceh lơh, ngui măi mok sồ tàm mùl màl, pơgồp bal tàm broă lơh pràn bơtàu tơnguh lơh sa mpồl bơtiàn mờ đơs nền gơnoar broă bơh rơnàng cau tờm rài tơnơ̆ do dà lơgar dê.

Ồng Y Giang Gry Niê Knơng pà git tai: “Tam gơl sồ geh gĭt nền là broă tam gơl pràn mờ ơruh pơnu pal dờp lam lài tàm broă lơh do. Ờ mìng lam lài ngui măi mok, mờ pal là mpồl tờm dong kờl làng bol lơh jăt broă lơh drơng ala internet, lơh niam sră nggal. Kơnòl bơh Đoàn là pal ai măi mok sồ tus tàm ƀòn, bơto sồr làng bol git ngui bơta ngăc ngar pa, lơh ngan tơn jơh bơta ờ ndrờm bal măi mok sồ đah tiah drà mờ tiah ƀòn lơgar, tiah ngài”.

Tàm bơta pal bơtàu tơnguh ngai sơlơ uă, càr Dăk Lăk ai ơruh pơnu là dùl tàm ală bơta pràn kwơ màng nàng lơh jăt mùl màl jơnau kơ̆p gơn bơtàu tơnguh, mờ là phan was ai broă bơtàu tơnguh kơl jăp in. Den tàng, broă lơh kah wơl gơnoar broă, kơnòl mờ kơ̆p kờñ ngan tă pơgồp dà kơlhề bơh rơnàng kơnòm să dê rơ̆p pơn jăt tai là bơta kwơ màng, pơgồp bal tàm broă bơ̆t bơtàu càr Dăk Lăk bơtàu tơnguh mhar mờ kơnhăp jŏ.