Cau kơnòm să tàm 13 pôs ling sền gàr tiah Nhàr lơgar mờ ală mpồl Tiểu đoàn Bơto tàp ling-Kơ động, Mpồl sền gàr tiah nhàr ling tàm dà lềng gơwèt Mpồl đơng lam Cau ling sền gàr tiah Nhàr lơgar càr Dăk Lăk neh dơlĕ bơyai lơh ală broă lơh rài kis broă lơh broă sa mpồl bơtiàn bè tus còp să, pà phan ală hìu nhă geh rài kis gơtìp kal ke, hìu nhă geh sră dong kờl; jào priă bơsram ai kơnòm bơsram rơƀah bơsram jăk; lơh niam wơl ală broă lơh, anih pơrhê dong kờl tiah nhàr lơgar tàm dà lềng mờ tàm ù gờl.

Bơta tờm bơh cau kơnòm să Sền gàr tiah Nhàr lơgar càr Dăk Lăk lơh di tàm dơ̆ do là broă mblàng yal, yal bè adăt boh lam bè gơnoar tờm dà lềng, bồt dà lềng, lơngăp lơngai tiah nhàr lơgar, mờ pơgồp bal broă mblàng yal bè tĕ khà cau ala măt Quốk hội khoă XVI mờ Mpồl duh broă Làng bol ală kấp tơngai lơh broă bơh nam 2026 tus 2031, tơrgùm tàm gơnoar, kơnòl bơh làng bol dê tàm broă tus bal tĕ khà. Bơh tŭ hơ̆, tơnguh jơnau git wă cíñ trị, nùs nhơm geh kơnòl ai đoàn viên, ơruh pơnu, cau tĕ khà là cau kis tàm tiah nhàr lơgar in tàm broă lơh jăt gơnoar mờ kơnòl làng bol dê, pơgồp bal tàm broă bơ̆t bơtàu Dà lơgar lơh broă tàm tơngu me adăt boh lam dê.