Tàm sàh tiah nhàr lơgar Ia Pnôn, càr Gia Lai, Mpồl Đơng lam Ling sền gàr tiah nhàr lơgar càr bơyai lơh broă lơh “Nhai pe Ơruh pơnu – Nhai Pe nhàr lơgar” mờ uă tơngu me kwơ màng bè jào broă lơh sòl àng, bơyai lơh mƀlàng nhơl geh kwơ ai kơnòm bơsram in. Bơta tơngŏ kwơ màng là dơ̆ pơrlòng “Rơngô tiang liang rơmit” mờ 20 jơnau lùp, dong kờl kơnờm bơsram Hìu bơsram Kấp dùl mờ Kấp bàr Lương Thế Vinh wă loh rơlao mờ nhàr dà lơgar dê, Adăt Nhàr lơgar Việt Nam kung bè gơnoar bơh mpồl Ling sền gàr tiah Nhàr lơgar. Bơh tŭ hơ̆, pơgồp bal tàm broă tơnguh uă jơnau git wă adăt boh lam, bơtơl nùs nhơm kờñ gơboh dà lơgaar mờ git geh kơnòl tàm broă sền gàr gơnoar tờm ù tiah tơn bơh tŭ gam bơsram sră.

Tàm broă lơh, mpồl do gam jào pà làng bol tàm ƀòn Triêl dùl “Broă lơh Sòl àng tiah nhàr lơgar” geh rơlao 75 tơlăk đong, bal mờ 50 pò phan pà ai kơnòm bơsram geh rài kis gơtìp kal ke in. Oh Rơ Lan H’ Hương, bơsram ơdŭ 9, Hìu bơsram Kấp dùl mờ Kấp bàr Lương Thế Vinh pà git: “Oh chờ hờp ngan tài geh tus bal broă lơh “Nhai Pe Ơruh pơnu – Nhai Pe tiah nhàr lơgar” mờ geh jòi sền nàng git wă bè nhàr dà lơgar mờ Adăt Nhàr lơgar Việt Nam dê. Oh lơh ngan bơsram jăk nàng ai tơngŏ nùs nhơm kờñ gơboh dà lơgar bơh rơnàng kơnòm să bol oh dê”.

Bal mờ hơ̆, tàm càr Dăk lăk, Cau ling sền gàr tiah nhàr lơgar càr do bơyai lơh Pơrjum cri bơyai mờ tơngu me “Ơruh pơnu Cau ling sền gàr tiah Nhàr lơgar càr Dăk Lăk kơ̆ nùs jăt Đảng”, pơgồp bal jờng rơ ală cau kơnòm să geh pơnrơ jăk nam 2025. Tàm pơrjum, kwang bàng, đảng viên ơruh pơnu pơdơng bơkào tềng jơnang rùp Wa Hồ mờ Cau ling tiah Nhàr lơgar, tơlik nùs nhơm ưn ngài Củ tịc Hồ Chí Minh, mờ ai tơngŏ broă lơh ngan pơn jăt tai bơsram sră, lơh jăt nùs nhơm, ơnà jăk, broă lơh bơh Wa Hồ dê, tơnguh bơhiàn jăk mpồl ling dê. Tàm dơ̆ pơrjum cri bơyai, ală cau ala măt neh cri bơyai uă broă lơh mờng chài, broă lơh niam chài, pơn jăt tai ai tơngŏ gơnoar lam lài, bơceh lơh bơh cau kơnòm să tàm broă lơh jăt kơnòl atbồ, sền gàr gơnoar tờm ù tiah tàm tiah nhàr dà lơgar. Di tàm dơ̆ do, mpồl ling do neh jờng rơ 10 “Nă cau pơnrơ jăk”, 7 “Nă cau kơnòm să pràn bơtàu tơnguh tàm tơnơ̆ do” nam 2025, mờ jờng rơ 1 mpồl mờ 2 nă cau geh cồng nha jăk ngan in.

Đại tá Đỗ Quang Thấm, Cíñ ủy Mpồl Đơng lam Ling sền gàr tiah Nhàr lơgar càr Dăk Lăk đơs nền: “Kơnòl atbồ sền gàr gơnoar tờm ù tiah, lơngăp lơngai tiah nhàr lơgar dà lơgar dê pal geh tơl nă kwang bàng, cau ling, tàm hơ̆ uă ngan là mpồl đoàn viên, ơruh pơnu, pal pơn jăt tai lơh ngan bơsram tàp nàng gơs dờng pràn rơlao tai. Sồr kấp ủy mpồl đơng lam ling klàng pơn jăt tai đơng lam, sồr lơh ai tơl bơta ƀuơn nàng đoàn viên mờ ală mpồl đoàn bơtàu tơnguh pràn kơl dang, mùl màl gơs tiah kwơ màng nàng bơto bơtê, bơsram tàp mờ bơtơl rơnàng kơnòm să ai mpồl ling in”.

Tŭ do Đoàn Ơruh pơnu Cau ling sền gàr tiah Nhàr lơgar càr Dăk Lăk geh 19 mpồl đoàn. Cau kơnòm să ală mpồl ling tus bal pơgồp mờ gơnoar atbồ sàh lơh ală broă lơh rài kis lơh sa mpồl bơtiàn, bơ̆t bơtàu ƀòn lơgar pa, dong kờl Làng bol tiah nhàr lơgar bơh ală broă lơh bè “Dong kờl oh lòt bơsram – Kòn ròng Pôs ling nhàr lơgar”, “Pơgru ling groăt tơlir”, “ATM dà kloh niam tiah nhàr lơgar”, “Sòl àng tiah nhàr lơgar”… Di tàm dơ̆ do, Tỉñ đoàn càr Dăk Lăk neh bơyai lơh Dơ̆ tơnkah 56 nam Ngai crơng gơs Đoàn Ơruh pơnu Kộng sản Hồ Chí Minh mờ tơngu me “Cau kơnòm să ală jơi bơtiàn càr Dăk Lăk – Kơ̆p kờñ ngan brồ să bal mờ dà lơgar”, mờ jờng rơ 56 nă cau geh pơnrơ jăk tơngai bơh nam 2020 tus 2025. Ala măt ală rơnàng kwang bàng Đoàn mờ kơnòm dềt tus bal tìp măt mờ tơngu me “Cau kơnòm să ală jơi bơtiàn càr Dăk Lăk – Kơ̆p kờñ brồ să bal mờ dà lơgar”, pơgồp bal lơh geh uă nùs nhơm pơn jăt tai bơhiàn ờs mờng, lơh geh kơnòl mờ kơ̆p kờñ lơh broă.

Di tàm dơ̆ do, Mpồl Lơh kơnòl broă sùm Tỉñ đoàn jờng rơ 56 mpồl, cau dùl nă să pơnrơ jăk; jào Khà jờng Lý Tự Trọng nam 2026 pà lŏ Lê Hiếu Vy, Ƀí thư Đoàn Hìu bơsram kấp pe Ngô Gia Tự. Bi Lương Minh Tùng, Ƀí thư Tỉñ đoàn càr Dăk Lăk đơs: “Do là dơ̆ pơrjum cíñ trị kwơ màng bơh mpồl Đoàn dê, nàng ală bơyô pa tào, kơnòm dềt đòm jăt bal broă lơh niam bơh ală bi lòt lài dê, lơh jăt niam kơnòl broă bơh să tờm, lơh ngan geh mŭt tàm Đoàn; mờ tơnguh mpồl lơh broă Đoàn, tus bal bơ̆t bơtàu Đảng, gơnoar atbồ ngai sơlơ pràn kơl dang”.

Ală broă lơh pràn niam, mùl màl tàm Nhai Ơruh pơnu nam do ờ mìng ai tơngŏ loh làng gơnoar lam lài, lơh broă nùs nhơm dong kờl bơh cau kơnòm să ală jơi bơtiàn Tây Nguyên dê, mờ gam pơgồp bal tàm broă bơtơl jơnau niam kăc màng, bơ̆t bơtàu nùs nhơm kờñ gơboh dà lơgar, geh kơnòl mờ mpồl bơtiàn, tus bal bơ̆t bơtàu mờ sền gàr kơl jăp gơnoar tờm ù tiah tàm tiah nhàr lơgar tàm bơta pa.