Drim òr (27/01), Mpồl đơng lam Ling sền gàr tiah nhàr lơgar càr Gia Lai pơgồp bal mờ Anih duh broă Làng bol sàh Ia Púch bơyai lơh broă lơh “Nam pa Sền gàr tiah nhàr lơgar – Ram nùs làng bol ƀòn lơgar” nam 2026 mờ uă broă lơh mùl màl wèt tus Làng bol tàm tiah nhàr lơgar.

Broă lơh do geh tìp bal niam chài, đơs crih tamya; pà phan ai hìu rơƀah, hìu nhă geh sră dong kờl, hìu kal ke; kham kòp, pơlam sền gàr bơta pràn kơl dang să jan mờ pà sơnơm ờ sa priă. Ală mpồl lơh broă, cau geh nùs nhơm niam neh jào pà rơlao 800 pò phan mờ kờp jơh priă rơlao 600 tơlăk đong. Bơdìh hơ̆ tai là ală broă lơh tềng bơdìh bè Hìu tăc phan 0 đong, Hìu tăc biăp tơlir Nhàr lơgar, “Tê jơn trơi Nhàr lơgar”, jơnau đơs ờs mờng mờ dơ̆ pơrlòng klơm mbar, ai geh nùs nhơm chờ hờp, đềt mềr bal ling klàng mờ làng bol. Do là broă lơh sùm pah nam, pơgồp bal tàm broă lơh geh cồng nha broă dong kờl rài kis mpồl bơtiàn, dong kờl làng bol tàm tiah nhàr lơgar wă rò Satềp hờm ram.