Tàm pơrjum, ala măt Mpồl cau ala măt Quốk hội càr Dăk Lăk neh yal tus cau tĕ khà ală cồng nha kwơ màng bơh pơrjum dê, tàm hơ̆ đơs uă tus mờ khà sră nggal adăt boh lam uă bal mờ jơnau lơh nền tàm pơrjum geh ring bal; ală broă lơh dờng bè bơtàu tơnguh lơh sa mpồl bơtiàn, kes priă dà lơgar; bal mờ broă kwang bàng mờ uă tơngu me gơrềng bal tơn tus rài kis làng bol.

Cau tĕ khà càr Dăk Lăk tơlik nùs nhơm ring bal mờ ală cồng nha mờ Quốk hội neh lơh geh, mờ đơs uă jơnau nàng pơn jăt tai lơh gơs gùng dà broă lơh bal mờ bơsong ală bơta mùl màl càr dê. Tàm khà ală tơngu me cau tĕ khà càr Dăk lăk sền gròi đơs uă là broă phơng sih, sơntìl phan tam, phan ròng ờ niam ờ pràn geh yal ƀuơn mờ tăc geh uă tàm internet. Cau tĕ khà kơ̆p kờñ ală gah lơh broă geh gơnoar lơh jăt nền nòn broă atbồ drà kă bro phan lơh broă sa suơn sre, lơh niam broă yal ờ di mờ mùl màl mờ lơh glài nền nòn ală cau lơi tìs. Bal mờ hơ̆, ală bơta rài kis broă lơh broă sa làng bol dê ndai kung geh uă cau tĕ khà càr Dăk Lăk đơs tus, tàm hơ̆ uă ngan là broă lơh bơtơ̆t rơbòng dà gơtìp tơrlah uă tơnơ̆ mờ mìu, dà tih dà cò pa do. Cau tĕ khà dan càr gờñ sền wơl, tơrgùm khà hoàc huơr mờ ai geh bơta pràn nàng lơh niam wơl, lơh wơl ală broă neh gơtìp gơrềng ờ niam.