Tàm sàh Ia Lốp, ù tiah nhàr lơgar tiah mat tơngai mut càr Dăk Lăk, rềp nhàr bal mờ càr Mondulkiri, lơgar Campuchia, ală ngai do, jơnau yal bè dơ̆ tĕ khà sùm geh đơs tus tàm ală dơ̆ pơrjum mpồl bơtiàn, ală dơ̆ pơrjum thôn, ƀòn halà tàm ală loa (tôri) pờ tơlik jơnau đơs bơh sàh dê. Bơh ală jơnau yal bè dơ̆ tĕ khà, cau tĕ khà cribơyai bal mờ gơ̆p bè ală cau tơlik mat tĕ khà, bè broă lơh lơh broă, bơta pràn jak mờ ală tă pơgồp bơh tơl nă cau dê lài mờ tŭ ai sac rơwah ai sră đùh bơh he dê. Cau tĕ khà Lang Văn Tuyển, Ƀí thư Ci ƀộ thôn Chiềng, sàh Ia Lốp pà gĭt:“Bơh broă lơh mblàng yal hòi jà den làng bol kung wă geh bơta dờng màng bơh ngai tĕ khà dê mờ làng bol kung chờ hờp brơn brài mờ làng bol kơ̆p tus ngai lòt tĕ khà tơl làm”.

Tàm dơ̆ tĕ khà dơ̆ do, cau tĕ khà tiah nhàr lơgar càr Dăk Lăk pơyoa uă bơta pin dờn mờ bơta kơ̆p kơnờm tàm ală cau ala mat rơ̆p ala mat ai jơnau đơs bơh he dê. Jat mò Vy Thị Hương, ơm tàm thôn Chiềng, sàh Ia Lốp, cau tĕ khà kơ̆p kờñ ală cau ala mat tơnơ̆ tŭ geh pồ rơ̆p sền gròi uă rlau tai tus ală broă geh ngan bơh tiah nhàr lơgar dê bè bơtàu tơnguh phan bơna bơt bơtàu, bơtàu tơnguh rài kis làng bol, lơh geh broă lơh kơnhăp kơ̆, pơgồp bơnah gàr kơ̆ sền gàr dà lơgar, lơngăp lơngai mờ bơta ring lơngai tàm tiah lam lài Dà lơgar dê:“Bol añ mho lơi kung iăt tàm loa mblàng yal lòt tĕ khà. Làng bol kung kơ̆p kờñ pồ geh ală cau geh bồ tơngoh jak chài nàng dong kờl làng bol tài bơh rài kis tơnơ̆ do mờ kơ̆p kờñ ală cau ala mat geh pồ rơ̆p sền gròi rài kis làng bol in niam rlau tai”.

Bal mờ cau tĕ khà tàm ƀòn lơgar, mpồl cau pơgru tàm tiah nhàr lơgar kung ơn uă bơta kơ̆p kơnờm tàm ală cau ala mat làng bol pồ tàm tơngai lơh broă tus. Mò Huỳnh Thị Bích Vân, Lam bồ Hìu bơsram Mầm non Thiên Nga, sàh tiah nhàr lơgar Ia Rvê pà gĭt, tơl nơm sră đùh gam là bơta pơyoa jơnau kơ̆p kờñ geh tai ală broă lơh sền gròi tus bơto bơtê tiah nhàr lơgar: “Bol añ kơ̆p kơnờm ală cau ala mat tơnơ̆ tŭ geh pồ rơ̆p sền gròi rlau tai tus bơto bơtê, is ồn là bơto bơtê mầm non tàm tiah nhàr lơgar”.

Nàng gàr niam ngai tĕ khà geh bơyai lơh di mờ jơnau sồr, broă lơh rcang tàm ală tiah nhàr lơgar càr Dăk Lăk gam geh lam lơh mhar ngan. Gùt càr geh 16 sàh, sơnah ƀòn tiah nhàr lơgar, geh 4 sàh tiah nhàr lơgar ù gờl mờ 12 sàh, sơnah ƀòn jat kềng gah dà lềng. Mat cau tĕ khà geh kờp sền nền nòn, jơnau yal bè ală cau tơlik mat tĕ khà geh lĭp loh làng. Mpồl ling sền gàr tiah nhàr lơgar pơgồp bal mờ kấp ủy, gơnoar atbồ ală tiah lơh pràn mblàng yal, hòi jà làng bol tus bal tĕ khà. Trung tá  ồng Trịnh Xuân Tuyên, Ƀí thư Đảng ủy, Cíñ ủy viên Pôs đồng ling sền gàr tiah nhàr lơgar Ia Rvê pà gĭt:“Mpồl lơh broă pơgồp bal mờ kấp ủy, gơnoar atbồ ală tiah mblàng yal nàng làng bol in gĭt loh gơnoar mờ kơnòl broă bơh he dê tŭ tus bal tĕ khà, mơkung hòi jà làng bol tus bal đùh sră tơl làm”.

Đại tá ồng Đỗ Quang Thấm, Cíñ ủy Mpồl đơng lam Mpồl ling sền gàr tiah nhàr lơgar càr Dăk Lăk pà gĭt, bal mờ dơ̆ hòi jà, mblàng yal cau tĕ khà tus bal tĕ khà, mpồl ling sền gàr tiah nhàr lơgar kung sơlơ tơnguh tai lòt sền, sŏk sền gơl gùng tiah nhàr lơgar. Mpồl ling sền gàr tiah nhàr lơgar càr Dăk Lăk sền gĭt gàr niam ngan lơngăp lơngai, ờdo ơdă, pơgồp bơnah lơh geh ală bơta ƀuơn ngan nàng cau tĕ khà in iang nùs tus bal ngai chờ tĕ khà:“Bol añ ai tai mpồl cau tàm ală tiah, is ồn là ală tiah tờm nàng gàr kơ̆ lơngăp lơngai cíñ trị, rơndăp tăp sèng lơngăp lơngai mpồl bơtiàn tiah nhàr lơgar. Mơkung lam lơh tai dơ̆ lòt sền, gròi sền kràñ tiah nhàr lơgar, nàng gàr niam ngan lơngăp lơngai ai dơ̆ tĕ khà mờr tus in”.

Bơh ală ƀòn lơgar tiah lam lài dà lơgar dê, cau tĕ khà tiah dà lềng càr Dăk Lăk gam crăp rcang ai ngai chờ dờng jơh gùt làng bol dê. Tơl nơm sră đùh ờ mìng tơngŏ gơnoar mờ kơnòl bơh làng bol dê lơm mờ gam pơyoa bơta pin dờn tàm ală cau ala mat ai nùs nhơm, bơta kơ̆p kờñ bơh làng bol dê, pơgồp bơnah bơt bơtàu tiah nhàr lơgar ngai sơlơ kơ̆ kơl jăp mờ bơtàu tơnguh.