Bơh àng drim gờñ ngan, gal ngan làng bol bơh 11 thôn bơh sàh tiah nhàr lơgar Ia Đal tơrgùm bal tàm anih bơyai lơh Broă lơh “Sơnam pa Sền gàr tiah nhàr lơgar ram nùs làng bol ƀòn lơgar”. Tàm do, làng bol lơh bal uă broă lơh chờ hờp Sa tềp, bè tàm pơrlòng trŭ mbar klơm kơnâm lơmpòng tơlir, tàm pơrlòng bơtò plai kòn, tam dŭi che, droh gai…Ală hìu bơnhă rài kis kal ke geh kwang bàng cau ling sền gàr tiah nhàr lơgar yal tơnggĭt tus “Cơldŭ ràng tăc phan zero đong” nàng săc ào mpha pa, dờp phe, tơngi sa, dà màn, ƀòk ngòk…Bi Lục Thị Đương, kòn cau Thái ơm tàm thôn 4, pà gĭt: 14 nam bơh ƀòn tờm càr Thanh Hoá mŭt tàm càr Kon Tum ơm kis lơh sa, pah tŭ tus sơnam pa Sa tềp rê, bi gơlơh bè geh kis wơl tai tàm nùs nhơm Sa tềp ƀòn tờm mờ gơlơh gŏ loh làng ngan nùs nhơm bơh kwang bàng cau ling sền gàr tiah nhàr lơgar dê, bè do: “Geh tus bal Sa tềp Sơnam pa Sền gàr tiah nhàr bơyai lơh den añ geh bơta hờn chờ brơn brài ngan. Añ là ngoh rơngăc ngan tài bơh Pôs đồng ling sền gàr tiah nhàr lơgar dong kờl làng bol bè oh kòn kòn sau bol hi dê đah Pôs đồng ling Sền gàr tiah nhàr lơgar kung dong kờl ròng siam sơl”.

Ai bi Hà Văn Tình, den đơs: “Wă rò nam pa Ất Tỵ 2025, geh Cau ling Sền gàr tiah nhàr lơgar càr Kon Tum bơyai lơh Ngai chờ piang mbar klơm kơnâm lơmpòng tơlir làng bol tàm tiah nhàr lơgar do brơn brài ngan. Di dơ̆ ngai chờ do là geh tìp măt lơh kwèng. Gah Đơng lam Cau ling Sền gàr tiah nhàr lơgar càr Kon Tum neh jàu ală bơnah phan pà gơ là geh kwơ ngan rê tus làng bol in. Ală hìu làng bol brơn brài chờ hờp ngan”.

Dơ̆ Sa tềp bơhiàn yau jơi bơtiàn dê nam do, sàh tiah nhàr lơgar Ia Đal, kơnhoàl Ia H’Drai geh Gah Đơng lam Cau ling Sền gàr tiah nhàr lơgar càr Kon Tum rwah bơyai lơh tơrlòng lài kâp càr Broă lơh “Sơnam pa Sền gàr tiah nhàr lơgar ram nùs làng bol ƀòn lơgar” gơ jăt bal mờ “Ngai chờ piang mbar klơm kơnâm lơpòng tơlir”. Tàm broă lơh, mpồl ling sền gàr tiah nhàr lơgar mờ gơnoar ătbồ tiah do neh jàu pà 400 nơm bồng bi Dà lơgar, rlau 250 bơnah phan pà, 400 yô piang mbar klơm kơnâm lơmpòng, jàu priă dong kờl bơsram ai 9 nă kơnòm bơsram gơ wèt Broă lơh “Yờ cơnđoà jơng oh tus hờ klờng”, broă lơh tơrlòng lài “Kòn ròng pôs đồng ling Sền gàr tiah nhàr lơgar”; jàu pà kơnrồ dra dong 2 hìu rƀah bơtàu tơngguh lơh sa…Kờp jơh priă phan pà do là rlau 350 tơlak đong. Thiếu tá ồng Nguyễn Văn Đại, Kwang đơng lam ciñ trị Pôs đồng ling Sền gàr tiah nhàr lơgar Ia Đal pà gĭt, do là bơta kah rơngal bơh kwang bàng, cau ling sền gàr tiah nhàr lơgar dê gơ wèt mờ làng bol tiah nhàr lơgar pah dơ̆ Sa tềp tus, Sơnam pa rê: “Bơh broă lơh do gàr geh nùs nhơm tam klăc đềt mềr đah ling klàng mờ làng bol tàm ƀòn lơgar kơnhoàl ù tiah nhàr lơgar. Bơh ndo, kung là nàng bol he prăp gàr bơhiàn ờs mờng bơta kwơ niam bơnĕ mờ lam lơh srơh nàng bal mờ cau ling sền gàr tiah nhàr lơgar sền gàr kơnhăp gơnoar tờm lơngăp lơngai tiah nhàr lơgar Dà lơgar dê”.

Lơh jăt jơnau đơs “ờ lời cau lơi gơtìp lời ơm wơl hờ ngkời”, lơh bè lơi nàng jơh tơl hìu, jơh tơl nă cau tàm tiah nhàr lơgar ndrờm geh bơta chờ sơnam pa mờ Sa tềp, pơn jăt tai bơh ngai 19 tus 25/01 do, cau ling sền gàr tiah nhàr lơgar càr Kon Tum dồ ròt bơyai lơh broă lơh “Sơnam pa Sền gàr tiah nhàr lơgar ram nùs làng bol ƀòn lơgar” mờ “Ngai chờ piang mbar kơnâm lơmpòng tơlir” tàm 12 sàh tàm tiah nhàr lơgar rềp nhàr mờ lơgar bơyô Lào mờ Campuchia. Geh gĭt, kờp jơh priă phan pà mờ broă lơh sền gròi Sa tềp bơhiàn dà lơgar dê nam Ất Tỵ 2025 mờ làng bol 13 sàh tiah nhàr lơgar càr Kon Tum là rlau 1 tơmàn đong.