Tơnơ̆ tŭ lam lơh uă dơ̆ bơyai lơh tam dră, kơryan cau lơh tìs di dơ̆ Sa tềp nam 2025, mpồl lơh broă geh gơnoar tàm kơnhoàl Đức Cơ, càr Gia Lai neh gŏ 2 dơ̆, kŭp 4 nă cau jun pơndiang 220 kĭ phăo tìs mờ kơrnoat boh lam.

Trung tá Nguyễn Lê Hồ Tân Ảnh, Atbồ Mpồl kảñ sát lùp khàu cau lơh tìs bè Kŭp jàm- Lơh sa- Ma túy (Kwang àng kơnhoàl Đức Cơ), pà gĭt:“Uă ngan là phăo blơi tìs mờ kơrnoat boh lam bơh lơgar Campuchia rê tàm lơgar Việt Nam. Gùng dà broă lơh, broă lơh, bơh ală cau dê sùm ngui là bơh ală bơta tàm internet nàng ală cau lơh broă. Ală cau ngui broă lơh là ơn phăo tàm ală kơldung halà ơn tàm ală rơndeh ôtô dềt, rơndeh drơng broă jun pơndiang năc, mpồn tàm rơndeh nàng jun pơndiang. Uă ngan là jơnau yal bơh làng bol dê yal là geh cồng nha ngan. Pơgồp bal mờ ală ƀan, gah broă, mpồl cau, sền sơ wì broă lòt rê mờ tă dia phan tăc blơi mờ lơgar ndai nàng gĭt jơnau yal bơh cau geh tơngŏ jun pơndiang, tăc bro, ơn prăp phăo bơrtoh nàng gĭt gŏ mờ kŭp”.

Tàm jơh gùt tiah nhàr lơgar càr Gia Lai, ală mpồl lơh broă geh gơnoar gam pơgồp bal niam gàr niam rơndăp tăp sèng lơngap lơngai mpồl bơtàn, kơryan ală broă lơh lơh tìs adat boh lam. Đại tá ồng Nguyễn Văn Nghị, Phó Cíñ ủy Gah đơng lam Mpồl ling sền gàr tiah nhàr lơgar càr Gia Lai, pà gĭt, mpồl ling sền gàr tiah nhàr lơgar bal mờ kwang àng ală kơnhoàl tiah nhàr lơgar Đức Cơ, Chư Prông, Ia Grai, neh kŭp rlau 1 rơbô kĭ phăo tăc bro tìs mờ kơrnoat boh lam. Đại tá ồng Nguyễn Văn Nghị, đơs: “Tàm ală nam do, tàm tiah nhàr lơgar càr Gia Lai geh broă lơh tăc bro phăo tìs mờ kơrnoat boh lam, tàm ală nhai rềp mờ dơ̆ Sa tềp, Mpồl ling sền gàr tiah nhàr lơgar càr Gia Lai neh lam lơh broă rơndăp lơh kơryan, rcang lài kơryan ală broă lơh tăc bro tìs mờ kơrnoat boh lam, blăc blơ̆ kă bro phan. Tàm tơngai pa do geh làng bol dong kờl den mpồl ling neh kŭp geh bàr pe dơ̆ tăc bro phăo tìs mờ kơrnoat boh lam. Bol añ kơryan ală broă lơh do nàng tiah nhàr lơgar càr Gia Lai in lơngăp lơngai”.