Tổng Ƀí thư ồng Tô Lâm tus bal, đơs mờ jàu khà jờng ai ală cau lơh ƀăo lơh geh khà jờng jơnhoa ngan rlau jơh. Bơh 2 rbô 544 jơnau cih pơyua tus Mpồl duh broă dar pơrlòng dŭt ndơl Khà jờng Mŭt mơ̆ rơmĭt dơ̆ IX- nam 2024 neh săc rwah ală jơnau cih jak ngan nàng jàu 6 khà A, 12 khà B, 18 khà C mờ 40 khà Pơn jờng. Anih Jơnau đơs Việt Nam chờ hờp ngan dờp 1 khà A bơh mpồl cau cih: Lê Tuyết, Vân Hồng, Thu Huyền mờ Đình Hiếu bơh Mpồl Jơnau gơlik geh pah ngan (VOV1) bal mờ jơnau cih “Tam gơl pa gùng dà broă lơh, broă tam gơl pràn lơh gơlik bơnàng jă nàng dà lơgar in mŭt tàm rài pa”, 1 khà B, 4 khà pơn jờng mờ là 1 tàm 15 mpồl cau dờp Sră jờng rơ bơh Mpồl Bơyai lơh dê tài bơh geh uă tă pơgồp jak ngan ai Khà jờng Mŭt mơ̆ rơmĭt in.

Ala măt ală oh mi là kwang đơng lam bồ Đảng, Dà lơgar ki ngàm jàu khà A- Khà jờng Mŭt mơ̆ rơmĭt dơ̆ IX- nam 2024 pà ală cau cih, mpồl cau cih ƀăo neh geh jơnau cih jak ngan, Tổng Ƀí thư ồng Tô Lâm đơs nền, tơngai do bơh bơta lam bồ bơh Đảng dê mờ lài ngan mờ să tờm tơn là Củ tịc Hồ Chí Minh dê, sră ƀăo Kăc màng Việt Nam sùm là mpồl cau tờm, ăt gơnoar broă lam lài tàm gah bồ tơngoh- niam chài, tă pơgồp dờng ngan tàm broă lơh kăc màng bơh Đảng mờ dà lơgar dê.