Tàm dơ̆ lơh broă, tơnơ̆ tŭ iăt jơnau yal mờ ală jơnau đơs tă pơgồp, Củ tịc lơgar ồng Lương Cường sền bal ring bal mờ ală tơngume neh geh đơs, mơkung đơs sùm jơnau sồr bơsram lơh jat jrô ơnàng làm uă, gĭt kơ̆ ală gùng dà broă lơh, jơnau sồr bơh Ƀộ Cíñ trị, Mpồl đơng lam Đảng, kung bè ală jơnau bơto pơlam bơh ală anih lơh broă geh gơrềng gơwèt mờ broă bơyai lơh ală broă lơh di dơ̆ Sa tềp bơhiàn dà lơgar nam Ơseh.

Củ tịc lơgar đơs sùm pal rcang niam ală bơta drơng broă làng bol chờ hờp wă rò sơnam pa Sa tềp bơhiàn nam Ơseh 2026 lơngăp lơngai, niam, tềm pềr, lơh geh nùs nhơm brơn brài chờ hờp mờ bơta gơn kơnờm ai jơh gùt Đảng, jơh gùt làng bol, jơh gùt ling klàng pơn đơl pràn lơh ngan lơh tus geh Jơnau lơh nền tàm pơrjum bơh Pơrjum dờng cau ala mat gùt lơgar dơ̆ 14 Đảng dê bơh tàm ală nhai bồ nam 2026. Bơyai lơh niam broă lơh lùp còp, pơndờm pơnđiang, gờm chờ Sa tềp kwang bàng jŏ nam lơh broă kăc màng, mè Việt Nam khin cha jak chài, cau ling sồt să, cau ling kòp tê jê să, hìu bơnhă cau ling chơ̆t màng, hìu bơnhă geh màng mờ dà lơgar, hìu bơnhă geh sră dong kờl dà lơgar, cau geh bồ tơngoh jak, cau cih jơnau đơs crih tam ya, cau geh bơngă pin dờn tàm làng bol jơi bơtiàn dồ ết nă cau, cau duh broă Yàng pơn rơ jak, ală mpồl ling phàu crong, mpồl Lơh kơnòl broă sùm lơh kơnòl broă tàm tơngai Sa tềp tàm tiah nhàr lơgar, bồt bơlào dà lềng, tiah sar lơgar ngài, ală tiah kal ke uă ngan... gàr niam tơl hìu bơnhă, tơl nă làng bol ndrờm geh chờ hờp nam pa wă rò Sa tềp.