Drim ngai 22/09, jat jiơ Việt Nam, Củ tịc lơgar ồng Lương Cường mờ pơ ùr bal mờ mpồl ala mat kấp dờng lơgar Việt Nam neh tus New York, lơgar Mỹ, tus bal Dar cribơyai bal kấp dờng Pơrjum dờng Liên hợp quôk khoă 80. Do là dơ̆ lòt lơh broă uă lơgar sơn rờp bơh Củ tịc lơgar dê tàm cribơyai gùt plai ù dờng ngan rlau jơh, mơkung lơh tềl 2 nam lơh geh bơta gĭt gơ̆p tam klăc lơh broă bal tơl làm Việt Nam mờ Mỹ. Mờr 50 nam do, bơta gĭt gơ̆p Việt Nam mờ Liên hợp quôk pơn jat tai bơtàu tơnguh niam, mut lơh broă jrô ơnàng làm uă.

Dơ̆ lòt lơh broă bơh Củ tịc lơgar dê tơngŏ gùng dà broă lơh cribơyai broă mờ lơgar ndai is, lơh tờm is, lơh li la uă, uă lơgar mờ mut gơ rờm bal ală lơgar tơl làm. Củ tịc lơgar kờp dŭ tus bal dơ̆ tơngkah kir sơnrai 80 nam tơnggơs Liên hợp quôk, đơs tàm dar cribơyai bal mờ Broă lơh kấp dờng gùt plai ù bè Broă lơh nhơm trồ tiah, mơkung geh ală dơ̆ tìp mat lơh kwèng, tìp mat bal đah 2 gah mờ đơng lam bồ ală mpồl ală lơgar mờ uă dà lơgar.