Tàm ngai lơh broă sơn rờp bơh Dơ̆ pơrjum dơ̆ Dùl, Quôk hội khoă XVI dê, drim ngai 06/4, Quôk hội neh lam lơh pồ Củ tịc Quôk hội lơgar Kộng hòa sàh hội củ nghiã Việt Nam khoă XVI, tơngai lơh broă bơh nam 2026 tus nam 2031. Củ tịc Quôk hội khoă XV ồng Trần Thanh Mẫn neh geh Quôk hội pồ pơn jat tai at gơnoar broă Củ tịc Quôk hội khoă XVI. Jơnau lơh nền tàm pơrjum bè broă pồ ồng Trần Thanh Mẫn at gơnoar broă Củ tịc Quôk hội neh geh ală cau ala mat Quôk hội pờ tê ring bal mờ jơh 491 nă cau ala mat tus bal pờ tê ring bal.

Đơs tơnơ̆ tŭ guh at gơnoar broă, Củ tịc Quôk hội ồng Trần Thanh Mẫn jơh nùs ưn ngài cau tĕ khà ƀòn dờng Hồ Chí Minh neh pin dờn pồ lơh cau ala mat Quôk hội khoă XVI; ală cau ala mat Quôk hội neh pin dờn pồ at gơnoar broă Củ tịc Quôk hội lơgar Kộng hòa sàh hội củ nghĩa Việt Nam khoă XVI; đơs là, do là bơta pơn yờ să dờng ngan, mờ kung là kơnòl dờng màng ngan tềng đap Đảng, Dà lơgar, cau tĕ khà mờ làng bol gùt lơgar. Củ tịc Quôk hội ồng Trần Thanh Mẫn hơ pơrgon rơp tă pơgồp jơh bơta pràn he dê, drơng broă dà lơgar, drơng broă làng bol in; bal mờ Quôk hội, Anih duh broă Lơh kơnòl broă sùm Quôk hội; ală anih lơh broă bơh Quôk hội dê mờ ală cau ala mat Quôk hội pơn jat tai tam gơl pa, lơh pràn ngui jak chài măi mok, tam gơl pa bơceh lơh, Quôk hội sồ, bồ tơngoh jak kòn bơnus lơh gơs, tơnguh bơta niam mờ cồng nha lơh broă, đơs gơ jat bal mờ lơh, lơh mơ, lơh di, lơh geh cồng nha, lơh tus gùng tus dà.