Lơh broă mờ Anih duh broă Niam chài mờ Mpồl bơtiàn Quốk hội dê, Củ tịc Quốk hội ồng Trần Thanh mẫn đơs niam bè broă lơh adăt boh lam, tàm jơh tơngai lơh broă, Anih duh broă do neh đơng lam lùp sền 20 jơnau rơcang cih adăt boh lam, 6 jơnau rơcang cih Jơnau lơh nền Quốk hội dê.

Đơs nền bal mờ broă bơtàu tơnguh lơh sa, pal sền gròi tus mờ ală bơta tàm mpồl bơtiàn mờ niam chài, jăt Củ tịc Quốk hội đơs, do là gah broă gơrềng bal tus mờ rài kis nùs nhơm bơh làng bol dê. Jơnau kờñ bơh Đảng he dê là pal drơng gàr rài kis phan bơna bal mờ rài kis nùs nhơm ai làng bol in. Niam chài là bơta tờm nàng tơl nă làng bol ndrờm kis pràn kơl dang, chờ hờp mờ niam bơnĕ rơlao. Jăt Củ tịc Quốk hội đơs, gah niam chài, mpồl bơtiàn tŭ do dà lơgar dê uă bơta niam, mơya kung gam ală bơta ờ niam pal geh ală jơnau đơs, jơnau sồr di tŭ gơwèt mờ Đảng, Dà lơgar in.