Nàng rơcang niam ngan rlau jơh ai ngai tĕ khà cau ala mat Quôk hội khoă XVI mờ cau ala mat Mpồl duh broă Làng bol ală kâp, tơngai lơh broă bơh nam 2026 tus nam 2031 in geh bơyai lơh tàm ngai 15/3 do, drim ngai 12/3, tàm Hìu lơh broă Quôk hội, Củ tịc Quôk hội ồng Trần Thanh Mẫn, Củ tịc Mpồl duh broă tĕ khà Dà lơgar neh đơng lam Dar pơrjum mờ ală mpồl dềt bơh Mpồl duh broă tĕ khà dà lơgar dê. Jat hơ̆, tŭ do, gùt lơgar geh mờr 79 tơlak nă cau tĕ khà, tàm rlau 72 rbô tiah đùh sră, mờ ală mpồl rơndap lơh tĕ khà geh rơcang wil tơl bơh dà lơgar tus ƀòn lơgar.

Đơs tàm dơ̆ lơh broă, Củ tịc Quôk hội ồng Trần Thanh Mẫn sồr kờñ pal gàr niam lơngăp lơngai, ờdo ờdă ai dơ̆ tĕ khà in. Ală anih lơh broă geh gơnoar rơcang lài git broă gơlik geh, sơlơ tơnguh tai ală broă lơh gàr niam lơngăp lơngai cíñ trị, rơndap tap sèng lơngăp lơngai tàm ală anih tĕ khà, di tŭ git gŏ mờ bơsong ală broă gơlik geh; sền gròi tus broă kơryan ală jơnau yal tìs, blac pơrlồm tàm internet, ờ lời ală mpồl ờ niam sơmờm tĕ khà nàng lơh roh bơta kơnhăp kơ̆; tơl tiah đùh sră pal niam ờdo ờdă, ƀuơn ƀuài nàng cau tĕ khà lam lơh gơnoar mờ kơnòl he dê. Tàm ngai tĕ khà 15/3 do, pal gàr sùm broă yal mhar, di tŭ, di ngan nàng yal Ƀộ Cíñ trị, Mpồl đơng lam Đảng dà lơgar mờ ală anih lơh broă geh gơnoar in; ală mpồl dềt bơh Mpồl duh broă tĕ khà dà lơgar kờñ rơcang wil tơl ală broă rơndap lơh bơsong tơl broă digơlan gơlik geh tàm ngai tĕ khà.