Di Tơnkah 96 nam ngai crơng gơs Đảng, Pơrjum dờng cau ala măt gùt lơgar dơ̆ 14 Đảng dê geh cồng nha niam bơnĕ; Di tơnkah 80 nam bơyai lơh tĕ khà sơnrờp ngan pồ Quốk hội Việt Nam mờ rơcang wă rò Satềp nam pa Ơseh 2026, drim òr (27/01), Củ tịc Quốk hội ồng Trần Thanh Mẫn neh tus chu nàng kah kơlôi tus Kwang atbồ Mpồl duh broă sùm Quốk hội ƀồc ồng Bùi Bằng Đoàn tàm tiah lời kir sàh Ứng Thiên, ƀòn dờng Hà Nội, ƀồc Tổng Ƀí thư ồng Trường Chinh, ƀồc Củ tịc Quốk hội ồng Lê Quang Đạo; còp mờ chờ gờm Satềp Tổng Ƀí thư lài do ồng Nông Đức Mạnh, Củ tịc Quốk hội lài do mò Nguyễn Thị Kim Ngân.

Củ tịc Quốk hội đơs, ală rơnàng cau ala măt Quốk hội tŭ do dan jăt bồ tơngoh dờng bơh ală rài kwang bàng lài do dê, mờ lơh ngan bơsram tàp bồ tơngoh bal mờ nùs nhơm lơh broă; pơgồp bal mờ broă bơ̆t bơtàu Quốk hội ngai sơolơ lơh tờm, lơh jăt gơnoar adăt boh lam, lơh broă jăk, lơh pa; di pal mờ nùs nhơm pin dờn bơh Đảng, Dà lơgar bal mờ Làng bol dê. Củ tịc Quốk hội đơs nền, tàm tơngai tus, Quốk hội rơ̆p pơn jăt tai tam gơl pa broă lơh, lơh broă jăk chài rơlao mờ lơh pa nàng di pal mờ ngai sơlơ niam rơlao bơh jơnau kờñ mùl màl tàm rài pa dà lơgar dê; pơn jăt tai lơh ngan, tam gơl gùng dà broă lơh, tam gơl pa pràn kơl dang bồ tơngoh lơh adăt boh lam, jăt gùng dà bơceh lơh mờ tề lam bơtàu tơnguh; lơh pràn broă lơh kwơ màng, bơceh lơh niam bơtàu tơnguh pa; tơrgùm lơh gơs, ndrờm bal kơrnoăt boh lam nàng bơtàu tơnguh mhar, kơl jăp dà lơgar; lơh ngan lơh geh cồng nha broă lơh “Quốk hội sồ”.