Bè jơnau neh yal, mho ngai 22 nhai 1 nam 2026, Pơrjum dờng cau ala măt gùt lơgar dơ̆ XIV Đảng dê neh pồ Mpồl Duh broă Đảng Dà lơgar khoă XIV geh 200 nă oh mi, tàm hơ̆ geh 180 nă oh mi mùl màl mờ 20 nă oh mi rơcang lài.

Drim do (23/01), Pơrjum dơ̆ sơnrờp Mpồl Duh broă Đảng Dà lơgar khoă XIV bơyai lơh pơrjum nàng pồ Ƀộ Cíñ trị, pồ Tổng Ƀí thư, pồ Mpồl Đơng lam Đảng Dà lơgar; iăt jơnau yal bè gùng dà bră lơh ală kwang bàng đơng lam bồ tờm Đảng, Dà lơgar dê bal mờ pơgồp jơnau đơs bè kwang bàng dờp lơh gơnoar broă Duh broă sùm Mpồl Đơng lam Đảng Dà lơgar; pồ Anih duh broă Sền swì Dà lơgar; pồ Kwang atbồ Anih duh broă Sền swì Dà lơgar.

Mpồl Duh broă Đảng Dà lơgar khoă XIV neh ring bal jơh pồ ồng Tô Lâm, Tổng Ƀí thư Mpồl Duh broă Đảng Dà lơgar khoă XIII pơn jăt tai at gơnoar broă Tổng Ƀí thư Mpồl Duh broă Đảng Dà lơgar khoă XIV.

Tổng Ƀí thư ồng Tô Lâm lời wơl uă bơta tơngŏ kwơ màng tàm broă đơng lam Đảng mờ ai geh gùng dà kwơ màng bơtàu tơnguh dà lơgar bơh tŭ tơnơ̆ mờ tŭ Mpồl duh broă Đảng Dà lơgar khoă XIII pồ at gơnoar broă Tổng Ƀí thư Mpồl Duh broă Đảng Kộng sản Việt Nam khoă XIII tàm nhai 8 nam 2024.

Dơ̆ rơndăp tăp sèng, tơrmù niam mpồl kwang bàng jăt Jơnau lơh nền tàm pơrjum sồ 18 bơh Dà lơgar dê geh lơh pràn kơl dang tàm tơngai ờ jŏ, mờ broă lơh dờng ngan bơh lài tus tŭ do mờ cồng nha geh nùs nhơm lơh pràn, ờ mìng gơmù bè mpồl lơh broă, gơmù cau lơh broă, gơmù priă tă sùm mờ kwơ màng rơlao là neh tơnguh uă bơta pràn, cồng nha bơh mpồl kwang bàng lơh broă, gơmù tăp lơh kòn gùng, tam pà kấp tam pà gơnoar geh lơh pràn jăt broă lơh rềp làng bol, dong kờl làng bol, drơng broă làng bol in niam rơlao; neh pờ geh bơta dờng ơnàng, lơh gơlik bơta pràn, ai geh bơta dờng jơnkah nàng bơtàu tơnguh lơh sa mpồl bơtiàn ai tơngai pơn jăt tai in.

Bơh lồi nam 2024 tus tŭ do, Ƀộ Cíñ trị neh ai geh 9 jơnau lơh nền tàm pơrjum geh kwơ màng ngan tàm jơh ală gah broă tờm dà lơgar dê. Do là ală gùng dà broă lơh dờng, ndrờm bal, ai tơngŏ bồ tơngoh tam gơl pa, nùs nhơm kơlôi sơnơng jŏ jòng mờ lơh ngan cíñ trị uă ngan bơh Đảng dê; là tơngu me tờm ai dà lơgar brồ să bơtàu tơnguh pas gơs pràn kơl dang tàm rài pa.