Bè jơnau neh yal, mho ngai 22/01/2026, Pơrjum dờng cau ala măt gùt lơgar dơ̆ XIV Đảng dê neh pồ Mpồl Duh broă Đảng Dà lơgar khoă XIV geh 200 nă oh mi, tàm hơ̆ geh 180 nă oh mi mùl màl, 20 nă oh mi rơcăng lài.

Drim do 23/01, Pơrjum dơ̆ sơnrờp Mpồl Duh broă Đảng Dà lơgar khoă XIV neh bơyai lơh dar pơrjum nàng pồ Ƀộ Cíñ trị, pồ Tổng Ƀí thư, pồ Mpồl Đơng lam Đảng Dà lơgar; iăt jơnau yal bè broă rơndăp lơh ală gơnoar broă đơng lam tờm bơh Đảng, Dà lơgar dê mờ ai jơnau đơs bè kwang bàng dờp lơh kơnòl broă gơnoar broă Duh broă sùm Mpồl Đơng lam Đảng dà lơgar; pồ Anih duh broă Sền swì Dà lơgar; pồ Cau lam bồ Anih duh broă Sền swì Dà lơgar.

 Mpồl Duh broă Đảng Dà lơgar khoă XIV neh ring bal jơh pồ ồng Tô Lâm, Tổng Ƀí thư Mpồl Duh broă Đảng Dà lơgar khoă XIII pơn jăt tai ăt gơnoar broă Tổng Ƀí thư Mpồl Duh broă Đảng Dà lơgar khoă XIV. Tổng Ƀí thư ồng Tô Lâm neh lời wơl uă tềl kah is ồn tàm đơng lam Đảng mờ pờ gùng dà kwơmàng ai bơtàu tơngguh dà lơgar in kờp bơh tơnơ̆ tŭ geh Mpồl Duh broă Đảng Dà lơgar khoă XIII pồ ăt gơnoar broă Tổng Ƀí thư Mpồl Duh broă Đảng Dà lơgar khoă XIII tàm nhai 08 nam 2024.  

Dơ̆ tam gơl bơta yau gơgơs bơta pa rơndăp tăp sèng, tơrmù dipal rơndăp mpồl lơh broă jăt Jơnau lơh nền tàm pơrjum sồ 18 Dà lơgar dê geh lam lơh pràn kơldang tàm tŭ tơngai lơyah, mờ broă lơh dờng ngan rlau jơh bơh lài tus tŭ do mờ cồng nha gơcèng bơta tam gơl pràn, ờ mìng gơmù khà bè mpồl, mpồl lơh broă, gơmù cau lơh broă sa priă nhai dà lơgar, gơmù priă tă sùm mờ kwơmàng rlau là neh tơngguh uă lơh gơtùi, cồng nha bơh mpồl lơh broă dê, gơmù kơnă cờn di gùl, pà kâp, jàu gơnoar geh lơh pràn jăt gùng rềp làng bol, wă wờng làng bol, drơng broă làng bol niam rlau; neh pờ gơlik ù tiah, ai tơl bơta niam bơta pràn in, lơh gơlik ù tiah nàng bơtàu tơngguh lơh sa – mpồl bơtiàn ai tŭ tơngai pơn jăt tai in.

Bơh lồi nam 2024 tus tŭ do, Ƀộ Cíñ trị neh ai lơh jăt 9 Jơnau lơh nền tàm pơrjum geh gơtha kwơmàng tàm jơh ală broă tờm dà lơgar dê. Do là ală pơlam gùng dờng, ndrờm bal, tơnggŏ bồ tơngoh tam gơl pa, bơta wèt sền jŏ tơngai mờ jơh nùs cíñ trị uă ngan Đảng dê; là bơnàng jă lam dà lơgar brồ să bơtàu tơngguh pas pràn mờ kơnhăp jŏ tàm rài pa.

Rài kis ồng Tô Lâm, Tổng Ƀí thư Mpồl Duh broă Đảng Dà lơgar khoă XIV   

    Ngai deh:  10/7/1957       Klau/ùr: Klau        Jơi bơtiàn: Yoan

- Ƀòn tờm: Sàh Nghĩa Trụ, kơnhoàl Văn Giang, càr Hưng Yên.

- Rài kis hìu bơnhă: Kwang bàng.

- Broă lơh tŭ geh rwah lơh broă: Kơnòm bơsram.

- Ngai geh rwah lơh broă mŭt Kwang àng làng bol: 10/1974.  

- Ngai mŭt Đảng: 22/8/1981.       Ngai ngan ngồn: 22/8/1982

-Sră cơng tàng geh bơsram:

        + Bơto bơtê pe kâp: 10/10.

        + Broă mờng lơh kơnòl broă: Đại học An ninh nhân dân.

        + Học hàm, học vị: Pơgru dờng, Tiến sìh.

        + Cribơyai jơnau tàm sră pơ àr cíñ trị: Kâp dờng.

        + Dà đơs lơgar bơdìh: Anh C

Tổng Ƀí thư ồng Tô Lâm là Kwang bàng Ƀộ Cíñ trị khoă XII, XIII, XIV; Kwang bàng Đảng Dà lơgar khoă XI, XII, XIII, XIV; Cau ala măt Quôk hội khoă XIV, XV.

Ngai 22.1.2026, tàm Pơrjum dờng cau ala măt gùt lơgar dơ̆ XIV Đảng dê, ồng geh pồ là Kwang bàng Đảng Dà lơgar khoă XIV, tơngai lơh kơnòl broă bơh nam 2026- 2031.

Drim ngai 23.1.2026, tàm Pơrjum dơ̆ sơnrờp Mpồl Duh broă Đảng Dà lơgar khoă XIV, ồng geh pồ lơh kwang bàng Ƀộ Cíñ trị khoă XIV mờ geh pồ ăt gơnoar broă Tổng Ƀí thư khoă XIV.