Mho ngai 14/01, Gah đơng Lam ling klàng càr Dăk Lăk bơyai lơh pơrjum yal ală jơnau lơh nền bơh Ƀộ Ling klàng dê mờ Anih lơh broă tă pơgồp jơnau đơs kwơmàng ling klàng dê bè broă rơndăp wơl Mpồl đơng lam Ling klàng kâp sàh, lơh geh jơnau sồr kơnòl broă tàm bơta pa. Tàm pơrjum, Ling tiah 5 neh yal mờ jàu jơnau lơh nền pồ geh tơngai gơ wèt mờ 102 nă ling geh griăt rê ăt gơnoar broă Lam bồ Mpồl đơng lam Ling klàng ală sàh, sơnah ƀòn tàm ù tiah càr Dăk Lăk.

Đơs sồr lơh, ƀí thư Tỉñ ủy càr Dăk Lăk ồng Lương Nguyễn Minh Triết đơs nền, broă ai ling geh griăt mpồl ling klàng rê tus bal lơh broă tàm Mpồl đơng lam Ling klàng kâp sàh là broă lơh jăt ngan ngồn gùng dà broă lơh dờng bơh Đảng dê, geh gơtha kwơmàng tàm bơ̆t bơtàu mpồl phàu crong kâp hơđơm kơnhăp pràn; Sồr ală ling geh griăt geh pồ mhar dờp lơh kơnòl broă, rơcăng lài gĭt nền ù tiah ƀòn lơgar, pơgồp bal niam mờ kâp ủy, gơnoar ătbồ kâp hơđơm, bơ̆t bơtàu Mpồl đơng lam Ling klàng kâp sàh kơnhăp pràn tơl làm.