Càr Dăk Lăk tŭ do geh rlau 2 tơlak 700 rbô nă cau blơi sră kham sơm kòp ờ sa priă, geh 99,9%, gơguh rlau 146 rbô nă cau pơndrờm mờ nam lài. Tàm pơrjum, ală cau ala mat geh yal bè ală broă sa kơñau priă kham sơm kòp ờ sa priă bè ngui sră kham sơm kòp ờ sa priă cau ndai dê, lơh ờ ngan halà tam gơl wơl sră nggal, cih ờ ngan sră kham sơm kòp, tơm priă kham sơm kòp gơ tàm rơndap rơndồl…nàng sa kơñau bơh kes priă sền gàr rềs àr.

Broă đal git, kơryan mờ lơh glài kràñ ală broă lơh tìs sa kơñau priă kham sơm kòp ờ sa priă nàng kờñ gàr gơnoar kuơ cau geh sră kham sơm kòp ờ sa priă dê mờ lam lơh geh cồng nha gùng dà broă lơh gàr lơngăp lơngai rài kis mpồl bơtiàn Đảng, Dà lơgar dê.