Mìu dờng bơh mang ngai 8/9 lơh bàr pe tiah tàm ù tiah càr Dăk Lăk dê gơlik geh ngơr bam dà uă tiah, gơrềng tus gùng lòt rê. Anih duh broă Làng bol càr Dăk Lăk sồr ală tiah lam lơh gùng dà broă lơh drơng mờ mìu dờng tàm ală ngai tus. Sờh Broă lơh sa suơn sre mờ Tiah ơm kis càr Dăk Lăk pà git tus 4 jiờ mho ngai 9/9, mìu dờng ờ hềt lơh gơbàn hoàc huơr bè cau, hìu đam mờ broă lơh sa. Mơya, bàr pe gơl gùng lòt rê gơtìp ngơr bam dà uă tiah.

Tàm sàh Ia Lốp, rbàng sồ 9 gam ngơr bam dà pơgăp 50 phơng, dà pơn jat tai gơguh tih, lơh gùng lòt rê gơtìp tam cah is. Gơnoar atbồ ƀòn lơgar neh hòi jà mpồl cau lam lài dang che, tơngkah lài sơbơng roh, ờ gŏ ai làng bol in lòt rê. Bàr pe tiah bơh sàh Ea Drông, sàh Ea Kar, sàh Cuôr Đăng, càr Dăk Lăk kung cih dờp ngơr băm dà uă tiah. Rlau 300 nă kơnòm bơsram tàm 2 tiah bơsram sàh Cuôr Đăng geh ai ơm rlô bơsram ing tài bơh gùng lòt rê gơtìp dà tih wềl. Tềng đăp bơta gơlik geh mìu gam kal ke, càr Dăk Lăk pơn jat tai sồr ală tiah gàr niam mpồl cau ơm gak, sùm sền gĭt jơnau yal tơngĭt lài, jơnau tơngkah lài bơh anih lơh broă yal tơngĭt lài trồ tiah dà ia dê, rcang lài lòt sền ală tiah geh pơhìn ngơr bam dà, dà lìu mờ tơrlah ù mờ ală tiah gùng lòt rê ờ niam. Ală tiah rcang lài broă lơh ntrờn làng bol tàm ală tiah geh pơhìn tơrlah ù uă tus tiah ơm lơngăp lơngai.