Lơh sa sồ càr Dăk Lăk dê geh pơlam gùng bơtàu tơngguh tàm bàr đah: bơ̆t bơtàu ală gah măy mŏk yal tơnggĭt, mblàng yal jơnau mờ drơng broă sa priă sồ gơrề uă tàm ală gah lơh sa tờm kwơmàng bè broă lơh sa sươn sre, lơh gơlik phan, kă bro phan, lòt nhơl mờ logistics. Jơnau kờñ tus nam 2030, lơh sa sồ tă pơgồp bơh 30% GRDP rlau hơđăng; 100% ală jơnau yal tơnggĭt ngui bal mờ mìng dùl gah geh lơh sồ, tàm tơrbŏ, tam pà. Nàng lơh geh jơnau kờñ do, Dăk Lăk rơ̆p tơrgùm lơh sir kơrnoăt boh lam, gùng dà broă lơh; bơtàu tơngguh phan bơna mờ ală jơnau yal sồ; chồl tơngguh mpồl lơh sa sồ, cau lơh broă sồ; mơkung tơngguh ngui măy mŏk tàm ală gah lơh sa mờ pal niam lơngăp lơngai, lơngăp lơngai internet.

Tàm dơ̆ pơrjum bè lơh sa sồ bơh Anih duh broă Làng bol càr Dăk Lăk dê, uă jơnau đơs đơs là broă tờm kwơmàng ờ mìng là bơcri tai phan bơna halà bơ̆t bơtàu ală bơnàng jă sồ, mờ pal tam gơl gùng dà bơtàu tơngguh bơh kơnờm tàm phan lơh geh tus kơnờm uă rlau tàm jơnau yal tơnggĭt mờ măy mŏk, bơh hơ̆ lơh gơlik geh bơta kwơ lơh sa ngan. Ală sră đơng pơlam măy mŏk sồ kung geh sồr nàng sền, jăt sền mờ đơng lam lơh jăt ală broă jàu bơtàu tơngguh lơh sa sồ.

Ồng Đỗ Hữu Huy, Chủ tịch Anih duh broă Làng bol càr Dăk Lăk sồr geh ală jơnau neh lơh nền bè lơh sa sồ jăt nùs nhơm ‘6 loh”. Tơl kơnòl broă pal gĭt nền dùl mpồl lơh broă đơng lam mờ geh phan bơna lơh geh loh làng.

“Jàu loh ai tơl sờh, tơl dùl broă mờ phan bơna lơh geh bơh sờh dê nhai do lơh bơta lơi, nhai tơnơ̆ bơta lơi. Sồr là pah nhai pal geh 1 phan bơna lơh geh nàng gơ in loh, loh cau, loh broă. Tàm broă rơndăp lơh lam lơh bơh càr dê neh sồr tơl dùl sàh sơnah ƀòn geh dùl KOL hơ̆ là cau tiơng pơnrơ nàng yal uă ală bơnàng jă lòt nhơl hơ̆ sồng phan bơna lơh geh, phan lơh geh OCOP ƀòn lơgar dê tàm ù tiah internet. Añ sồr pal lòt mŭt tàm phan bơna đo was gơtùi”.