Dăk Lăk tŭ do geh rlau 4 rơbô 100 nơm ơhò, plung, tàm hơ̆ geh 428 nơm ơhò pràn 90CV lòt tàm dà lềng kŭp phan tàm dà. Jat 189 kơi sồ kềng gah dà lềng, gĭt nđờ rơbô hìu bơnhă làng bol ơm kis, ròng phan tàm dà mờ kă bro drơng broă lòt nhơl dà lềng. Tàm tơngai kàl mìu càl rơbŭt uă, mpồl lơh broă geh gơnoar mờ làng bol càr Dăk Lăk rcang lài uă broă lơh nàng drơng mờ trồ tiah lơh aniai, gàr niam lơngăp lơngai ai cau, phan bơna mờ tơrmù ƀà hoàc huơr lơh sa.

Tàm tiah anih ơhò ơm Vũng Rô, sàh Hòa Xuân Nam, tŭ do geh rlau 600 nơm hìu gŭ ròng ka, 68 nơm plung dờng bơh làng bol kŭp ka bal mờ pơgăp 140 nơm ơhò bơh ală càr sùm ơm tềng do. Do là tiah ờ geh càl, geh sền là tiah pleh mìu càl rơbŭt dờng lơngăp lơngai. Bơdìh mờ kơnòl broă sền gàr tiah nhàr dà lềng, mpồl ling sền gàr tiah nhàr lơgar mpồl ling sùm pơgồp bal drơng lài mờ trồ tiah lơh aniai, dong kờl làng bol kŭp ka mờ làng bol ơm kis tàm dà lềng. Bơta rcang lài bơh ală mpồl ling dê dong tơrmù ƀà hoàc huơr, lơh geh bơta pin dờn nàng làng bol in pơn jat tai lòt tàm dà lềng kŭp ka, pơgồp bơnah sền gàr gơnoar tờm mờ bơtàu tơnguh lơh sa ƀòn lơgar.